Partisipashon na e konferensha di “High Level Security” ku resientemente a tuma lugá na Sürnam tabata fruktífero, di akuerdo ku Minister di Hustisia mr. Shalten Hato.
Minister Hato a bishitá Sürnam di 19 pa 24 di aprel, durante kual el a partisipá na e konferensha di “High Level Security”. A trata diferente tópiko, manera entre otro krímen sibernétiko.
Durante su bishita na Sürnam, minister Hato a hiba kombersashon ku e minister enkargá ku asuntunan eksterior di Sürnam, sr. Albert Ramdin, ku kende el a elaborá mas en ekstenso riba e problemátiko di migrantenan. Minister Hato a duna di konosé na minister Ramdin ku e ta trahando riba un maneho nobo pa loke ta trata migrantenan i tambe ku lo mester kaba traha riba leinan mas moderno ku ta adaptá na e situashon aktual di pais.
Minister Hato a indiká ku a base dje konklushonnan ku a sali for di e konferensha, el lo ta dispuesto na sigui traha den estrecho koperashon ku Sürnam riba tereno di hustisia.
Minister Ramdin di su parti tambe a ekspresá e deseo pa awor ku Sürnam lo asumí presidensia di CARICOM, ku Kòrsou lo bira miembro asosiá di CARICOM. Minister Ramdin lo sòru pa mas pronto ku ta posibel realisá un bishita di trabou serka Promé Minister Pisas.
