ORANJESTAD, Aruba
Dia 15 di maart 2020 ta dia Mundial di Derechonan di Consumidor.
E aña aki e tema ta trata: “e consumidor sostenibel”.
Ariba e dia aki organisacionan di consumidornan rond di mundo, den cordinacion cu Consumers International, ta reuni pa haci peticion pa cambionan global y duradero pa evita colapso ambiental resaltando e proteccion y empoderamiento di e consumidor rond mundo.
Considerando cu actualmente nos ta encontrando un crisis ambiental, causando e.o. cambio climatico y perdida di biodiversidad, ta urgi medidanan drastico pa aborda e crisis mundial aki.
Den e cuadro aki lo destaca e cambionan cu e consumidor por haci y cu gobierno y companianan mester ehecuta pa por haci sostenibilidad un opcion mas fasil pa e consumidornan.
E crisis cu nos ta enfrentando ta asina urgente cu nos tur tin cu uni y tuma nos responsabilidad pa por resolve.
E demanda di producto sostenibel ta aumentando, especialmente entre consumidornan mas hoben. E campaña ta enfoca particularmente ariba hobennan, mirando e activismo den e generacion encuanto e tema.
E decada aki ta nos ultimo oportunidad pa limita calentamiento global. Pa logra esaki nos mester reduci emision di gasnan di efecto invernadero (GEI), desperdicio y haci uso di recurso di tur sector.
Un forma pa logra esaki ta haciendo cu e manera di produci y consumi ta mas sostenibel. Pa e consumidor e consumo sostenibel ta trata di haci mas cu lo menos, por ehempel, cambia pa productonan energeticamente eficiente, intercambia alimento, huur of cumpra cosnan segunda mano y tambe uso conciente di awa, coriente of combustible.
For di un estudio global por conclui cu 66% di consumidornan ta bisa cu nan ta dispuesto pa paga mas pa productonan sostenibel, pero locual ta limitanan ta barrera nan manera e prijs, disponibilidad y falta di informacion.
E consumidor tin un papel hopi importante den e cuadro di sostenibilidad, sinembargo nan no por logra e meta aki nan so.
Ta urgi Gobierno y companianan tambe pa actua pa crea cadena di suministro mas sostenibel, eliminando desperdicio y ineficiencianan den produccion prome cu e productonan yega na tiendanan, creando e posibilidad pa reciclahe y asegurando cu e consumidornan haya e informacion necesario pa por tuma decisionan responsabel.
Gobierno y companianan tambe tin cu demostra liderazgo internacional mediante establecimiento y conduccion di obhetivonan di ambicion pa limita e calentamiento global promoviendo e sostenibilidad den consumo.
Dienst Huur en- Consumentenzaken (DHC), cual departamento ta resorta bow di Ministerio di Asuntonan Social y Labor ta e departamento di gobierno encarga cu promocion di consumo responsabel, informando consumidornan encuanto producto y servicionan.
Den cuadro di e tema y desaroyonan mundial, e vision di Gobierno y tambe e metanan (Mundial) pa Desaroyo Sostenibel, e asina jama “Sustainable Development Goals” (SDG’s) di Nacionnan Uni, meta SDG 12 cual ta trata sostenibilidad, pronto DHC lo conoce un structura nobo pa asina por duna un sosten mas amplio y al dia na e consumidor resaltando e proteccion y empoderamiento di e consumidor.
![Minister Di Asuntonan Social Y Labor Glenbert Croes Ta Anuncia E Tema Di Día Mundial Di Derechonan Di Consumidor 2020: “E Consumidor Sostenibel” 155 Glenbert E1559908101547](https://www.earubianonews.com/wp-content/uploads/2020/03/glenbert-e1559908101547.jpg)