Situacion di trafico na Aruba ta un prioridad y ta un punto di preocupacion di Minister demisionario Rocco Tjon. Esaki a poni cu na comienso di aña 2025 lo cuminsa cu un campaña nacional di “Trafico Sigur “. Banda di esaki a cuminsa cu otro iniciativa nan pa eleva siguridad den trafico.
E idea tras di e campaña nacional ta conscientisacion. Sinembargo na final di dia si nos mester mira bon no ta e vehiculo ta esun cu ta causa e accidente pero e hende cu ta tras di e stuur ta esun cu ta ocasiona e accidente. Pesey mes e campaña mester influencia e comportacion di esun tras di e stuur na un manera positivo. Lo pusha den tur medio e campaña “Trafico Sigur” pa asina despues di un aña por midi y haya sa kico ta e resultado.
E problemanan den trafico no ta solamente e ciudadano tras di stuur pa bira mas consciente , pero tambe mester adapta ley y e proceso aki ta wordo inicia , pero nos mester ta realistico tambe cu cambionan di ley no ta algo cu ta sosode di awe pa mañan, e ta un proceso basta largo.
Tambe minister Rocco Tjon ta indica cu lo bay amplia e capacidad na corte unda cu lo aloca mas fondo unda cu na corte por aloca un hues adicional cu ta bay atende cu solamente casonan di trafico, principalmente casonan di personanan bou di influencia. Tambe a haci cambionan den ley unda cu por aplica pa snelrecht , porehempel si un persona a ocasiona un accidente awe por bisa cu aki dos siman e caso lo ta dilanti hues y depende di e caso e persona ta haya un castigo di prizon of ta haya un boet.
Segun Tjon esaki ta pa evita cu casonan ta sosode awe y ta haya un cita denter di un pa dos aña, di e forma aki ta influencia e comportacion di e chauffeur. Tambe tin un encuesta cu a keda haci bou di nos comunidad. Lo ta bay tin un encuesta nacional dialuna awo 4 di november 2024 unda cu ta bay bin cu tur e stakeholdersnan hunto y presenta e resultadonan. Na mes momento Tjon ta indica cu cifranan ta mustra cu tres punto den trafico cu ta mas preocupante ta Uzo di alcohol den trafico, velocidad y uzo di telefon. Riba e tres puntonan aki ta mira cu e leynan mester wordo adapta pa por atende cu e tres aspectonan aki mas miho.
Cambio den trafico ta keda un aspecto di e mentalidad di e persona tras di stuur. Un gobernante por bin cu tur cambio di ley y maneho pero na momento cu e persona di su mes ta scoge pa core iresponsabel y of e step riba careteranan di Aruba e ta un escogencia di e persona y su mentalidad.
Segun Tjon ta importante pa cuminsa traha den e parti aki y ta kere cuminsa for di chikito na scolnan lo trece un cambio sigur. Un mucha ta influencia comportacion di un mayor hopi y e mayor lo percura di scucha for di e mucha. Ta kere cu lo enfoca na scolnan hopi mas.