Minister demisionario Lampe a entrega keho contra SKOA, Departamento Finanza y funcionarionan

Despues di a ricibi rapport di Centrale Accountantsdienst, minister demisionario di Enseñansa a dicidi di bay Landsrecherche pa entrega un keho contra instancianan. “Esaki tabata un atraco riba caha di gobierno,” Lampe a bisa y a menciona un suma di mas cu 12 miyon florin.
Pafo el a topa cu prensa y a splica e motibo di su presencia na Landsrecherche.
El a repasa con na inicio di su posición como minister el a entrega keho caba pa iregularidadnan cu a tuma luga na Enseñansa pa Empleo y na EPB. Awo finalisando su periodo, e ta haci otro denuncia.
E denuncia ta contra SKOA (fundacion cu ta maneha scolnan publico) y contra Directie Onderwijs, y funcionarionan cu tin di haber cu e caso aki.
El a informa cu e siman aki a bini un cambio den henter discusion riba trahadonan di limpiesa di SKOA. El a recorda cu na dos ocasion Corte a dicta caba cu SKOA a actua contra ley. E siman aki a bini un hecho nobo dilanti, ora cu a resulta for di e relato di CAD cu desde inicio diferente persona a coopera for di inicio pa ehecuta algo cu ta contra ley. “Den palabranan simpel, tin un atraco organisa riba caha di gobierno. E botin di e atraco a wordo reparti entre hende humilde, cu ta e trahadonan di limpiesa, pero e no ta kita cu e ta un atraco. E no kita cu esaki ta un hecho castigabel. Pa e motibo ey nos a bini Landsrecherche.” El a enfatisa cu diferente persona a planea e atraco riba caha di gobierno.
E ta lamenta cu na momento cu el a haci denuncia publico di e atraco aki, ningun institucionnan importante di e pais, manera Prome Minister, no a para band’e dje en busca di husticia. Pero tampoco sindicato di trahadonan publico, cu a bisa cu e falta madurez “simplemente pasobra mi no kier aproba e atraco aki riba caha di gobierno.”
Lampe a ripiti e palabranan cu el a uza den Parlamento unda el a bisa “mi ta prefera perde voto y bira impopular, pero no perde mi consenshi. Mi ta prefera di ta un perdedo, pero basta cu mi no perde respet pa placa di pueblo. Despues di mi añanan di experencianan como minister, mi tin cu bisa cu nos ta leu di integridad na e pais aki. Hopi biaha ta uza e palabra aki pa papia di dje, pero haci y practica respet pa placa di pueblo ta otro cos.” El a agrega cu e lucha pa integridad lo bay tuma mas hopi tempo di loke el a pensa inicialmente.