Den conexion cu dia 1 di mei, Minister di Turismo y Salud Publico Sr. Dangui Oduber ta desea e pueblo trahado di Aruba un Feliz Dia di Obrero. Tambe pa tur trahado sigui cu nan gran aporte na nos comunidad muy en e special na esnan cu ta labora den nos sector turistico y na esnan cu ta traha den salubridad.
Minister Oduber tin hopi aprecio pa tur esnan cu ta traha den sector turistico. Personanan cu ta traha dia aden y dia afor, tambe ariba dianan di fiesta pa Aruba por sigui yama su mes e perla den Caribe. Mescos ta bay pa tur nos trahadornan cu ta traha den salubridad, danki pa boso servicio cu boso ta duna na nos comunidad trahando wardanan di 24 ora y tambe den dianan di fiesta.
E derecho di un obrero a conoce hopi cambio desde introduccion di e Dia di Obrero mas di 130 aña pasa.
Nos mester tuma un rato y para keto y reflexiona riba tur e derechonan cu nos ta disfrutando di dje awendia y semper mira kiko por wordo haci pa mehora esaki aun mas.
Riba e dia aki mi ta desea di manda un palabra di pabien pa tur e pueblo trahado di Aruba pa a yuda y ta sigui yuda na e construccion di nos dushi Baranca cu nos ta yama Aruba. – Minister Dangui Oduber.