ORANJESTAD,Aruba
Un di e puntonan hopi importante den nos programma di partido y tambe den nos programma di gobernacion tawata pa durante e gobernacion aki por logra cu nos studiantenan di Aruba tin e opcion pa sigui specialisa den region y wordo reconoci oficialmente como specialist na Aruba.
Semper tawata asina cu na momento cu studiante kier sigui specialisa den e ramo di cuido medico e unico opcion cu nan tawata tin ta sigui studia y specialisa na Hulanda pa nan por drenta e BIG register. Si un studiante por ehempel kier sigui studia na Colombia, Costa Rica, Merca of Canada esaki no lo wordo a reconoci.
Manera cu nos a drenta den gobierno nos a cuminsa e proceso di Arubig. E proceso pa reconoce nos yuinan di tera cu ta sigui specialisa den region den nan profession como medico. E no tawata un proceso facil y e proceso a tuma su tempo. Cu e Arubig nos kier logra cu nos yuinan di tera por sigui specialisa na Colombia, Costa Rica, Merca y Canada y nos kier garantiza cu tur esnan cu specialisa tin un calidad halto pa di e forma aki nos por mantene nos nivel di cuido.
Ministerio di turismo, salud publico y deporte a traha hopi duro riba e proyecto aki. Nos mester a haci investigacionan, mester a haci cambio den e decreto basa rica Arubig, mester cuminsa set up un kwaliteitsinstituut, mester a busca contacto cu organonan di accreditacion y tambe stipula opleidingseisen, cu ta enfoca arriba universidadnan den regio cu ta compatibel cu e normanan halto cu nos ta usa na Aruba.
Tur esaki naturalmente ta tuma su tempo pa por prepara algo bon. Nos a logra haci tur e trabounan y tur e cambionan conforme procedura mester wordo manda e organo consultativo (Raad van Advies) pa nan por repasa e cambionan y tambe duna un conseho riba esaki.
Siman pasa nos a ricibi e conseho di Raad van Advies riba e cambionan den decreto di Arubig y nos tin cu bisa nos ta hopi satisfecho cu e conseho aki.
Awor ta traha riba e nader rapport, y después e decreto lo keda manda pa Gobernador. Una vez esaki ta cla oficialmente nos por bisa cu Arubig ta cla y esaki ta un logro hopi grandi pa pais Aruba y sigur pa nos yuinan di tera cu kier sigui specialisa den region. Cu esaki nos ta cumpli cu nos promesa. Semper bo tin cu bisa loke bo ta bai haci y haci loke bo ta bisa!
Nos lo mantene communidad informa di e ultimo desaroyonan y lo anuncia oficialmente ora e proceso ta cla por completo cu lo ta dentro di poco!
