Dialuna Fundacion Movemiento ta Bida a anuncia cu despues di 5 aña nan lo ta organisando e segundo edicion di Caribbean Aging Congress. E meta di esaki ta pa duna e informacion necesario na tur e profesionalnan na Aruba riba locual ta e aspecto fisico y general ora ta trata cu adulto mayor. Como e minister encarga cu Salud Publico Minister Oduber sigur ta sostene e tipo di iniciativanan caminda ta promove actividadnan fisico den tur edad di nos poblacion.
E programa di Fundacion Movemiento ta Bida sigur ta cuadra cu e maneho cu Minister Oduber ta hiba. E mandatario su maneho ta basa grandemente riba prevenecion. Tin un plan nacional di prevencion di malesanan NCD’s, un parti importante di e plan aki ta e parti di conscientisacion di nos comunidad. E programa ta dirigi riba e adulto mayor, pa mehora nan estilo di bida incorporando actividad fisico como parti di nan rutina diario.
Minister Oduber ta di opinion cu na Aruba keda sin haci nada ya no ta un opcion mas. Aruba su poblacion ta pasando den un “vergrijzing” cu tur e consequencianan cu esaki tin riba nos seguro medico general. Pesey e programa aki no ta solamente importante pero tambe necesario pa nos profesionalnan por ta mas consciente di nan trabou na momento cu nos adultonan mayor ta den nan man.
Minister Oduber ta gradici Fundacion Movemiento di Bida pa tur e trabounan cu nan ta haci pa nos adultonan mayor. Tambe e mandatario ta deseanan tur clase di exito cu e Caribbean Aging Congress cu ta tumando lugar 1 y 2 di oktober proximo.
