Diahuebs mainta Minister di Turismo y Salud Publico sr. Dangui Oduber tabata na Hyatt Place. Aki e mandatario a duna un presentacion riba locual ta e proyecto di Aruba Happy One Pass/Seamless Travel. Esaki ta un proyecto cu ya pa basta tempo ta trahando riba dje cual lo bay crea un experiencia mucho mas placentero pa e turistanan cu ta bishita nos isla.
Minister Oduber semper a kere den e innovacion y a opta pa haci esaki central den e strategia di su maneho y su vision. Un di e mihor ehempelnan cu tin den innovacion ta e creacion di e Aruba Health App den salubridad, cu a facilita henter e procedura di test teniendo tur informacion centralisa y accesibel pa henter e comunidad di Aruba. E systema aki a keda reconoci internacionalmente como un solucion caminda biaheronan por demostra nan informacion di salud na aerolineanan, hotelnan y otro companianan den e industria di hospitalidad na un manera sigur y discreto.
Minister Dangui Oduber a menciona cu ya caba pa un tempo ta trahando den bon colaboracion cu e compania SITA y demas stakeholders pa haci e proyecto di Aruba Happy One Pass/Seamless Travel un realidad. E proyecto aki lo bay yuda na promove nos turismo, e lo transforma e experiencia di cada un bishitante, ofreciendonan e miho calidad di servicio prome cu nan stap den e avion rumbo pa nos isla.
E mandatario a splica cu durante e prome fase di e “Seamless Travel Experience”, Aruba lo ta trahando di serca cu e aerolineanan pa optimalisa e procedura di check in inicia pa e pasahero. Despues di esaki e informacion di e pasahero lo pasa door di e systema di SITA cual lo check mesora si esaki ta cuadra cu e informacion cu Gobierno tin aproba riba e ED card. Esakinan ta e prome pasonan pa sigura un experiencia mas confortabel y lihe pa nos bishitantenan.
Minister Oduber su meta ta pa sigui crea socionan pa asina sigui desaroya e proyecto aki den henter e industria di hospitalidad pa asina mas y mas stakeholders por beneficia di e innovacion aki pa asina por ofrece e mihor calidad di servicio na nan huesped. E obhetivo principal di e “Seamless Travel Experience” ta pa fomenta un proceso di biahe ful digitalisa y mas eficiente pa biaha for di y pa Aruba.
Minister Dangui Oduber ta sigur cu na momento cu esaki keda completa, e introduccion caminda por biaha cu credencialnan digital lo bay atrae mas turista. Esaki tambe lo bay pone Aruba como e frontline den innovacion y progreso den henter industria di turismo y hospitalidad mientras nos ta keda proteha e calidad di e producto Aruba.
