Diabierna merdia Minister di Turismo y Salud Publico sr. Dangui Oduber tabata na ImSan. Aki e mandatario a presencia e bunita momento caminda cu dr. Rajnherc a duna e bon noticia na full e team di ImSan cu nan a logra haya nan preliminary Gold Seal of Approval accreditation di Joint Commission International (JCI).
Durante tur e añanan cu a transcuri ImSan a traha hopi duro pa logra e acreditacion di JCI. Un reto cu a cuminsa bou di Gabinete Wever-Croes1 caminda hopi inversionnan a tuma lugar asina Minister Oduber a trece dilanti. Minister Oduber desde principio a sostene ImSan y a percura pa aproba e financiamento di nan masterplan.
E acreditacion di JCI aki lo habri posibilidadnan nobo pa ImSan por sigui crece y mehora e calidad di cuido na Aruba y explora turismo medico. ImSan lo ta e prome hospital acredita den ful e region di Caribe Hulandes. Na mundo tin un total di 1000 instituto den 70 pais cu tin e acreditacion aki. Dentro di 10 dia despues di 23 juni Aruba tambe lo ta formando parti di e grupo aki.
Aruba sigur ta orguyoso di e logro aki, Minister Oduber ta manda felisitacion na e management, e staff y ful e personal pa e excelente trabou di cuido y servicio cu a haci e acreditacion aki posibel.
Minister Dangui Oduber lo sigui duna tur cooperacion na ImSan y tambe Hospital HOH pa asina percura pa mehoracion di cuido, calidad y servicio.
