Dialuna tabatin un discusion basta fuerte entre Parlamentario Ricardo Croes y Minister di Salubridad Publico Dangui Oduber den Parlamento.
E ta un discusion riba vacuna cu tin algun dia caba andando. Y cada bes cu e tema bini dilanti e dos politiconan, cu nan partido ta forma parti di e coalicion cu ta apoya gobierno, ta clash cu otro. Esaki no tabata diferente dialuna ultimo den un Bijeenkomst di Parlamento.
Croes a bini cu un lista largo di e vacuna contra COVID, cu e ta bisa ta experimental pa cual e no ta confia esaki. Pero tabata parce cu cada pregunta cu el a haci, a causa un iritacion cerca e mandatario. Mas ainda ora cu e mandatario tabata hiba palabra y Croes tabata interumpie cada rato.
Hasta durante e discusion Croes, di partido RED, a bisa of a reta e mandatario. El a bisa cu e si ta un academico pero e no sa esey di Minister Dangui Oduber y a ret’e pa mustra su diploma cu e ta un academico.
Por a constata cu e mandatario a publica su diploma di Hogeschool INHOLLAND (Rotterdam) unda el a finalisa su estudio di Management Economie & Recht dia 7 di juli, 2005. Pues e impresion cu Ricardo Croes a trece cu Dangui Oduber no tin ningun titulo no ta cuadra. Y el a proba esaki cu su Bachelor Degree.
