Parlamento Minister di Turismo, Salubriad Publico y Deporte Sr. Dangui Oduber a contesta diferente preguntanan di miembronan di fraccion di AVP.
Minister Oduber ta condena e hecho cu Sra. Wyatt-Ras a haya ta bon pa hunga politica barata den un pandemia na unda tin famianan a perde nan ser keri door di COVID-19. Aruba ta pasando den un situacion hopi serio y pesey ta tristo pa mira con partido AVP kier hunga politica cu dolor di hende. Awor cu e casonan ta bahando enbes cu e Parlamentario duna palabra di merito na e crisis team y esnan cu ta traha den salubridad. E Parlamentario ta dicidi di bisa cu ta a base di e factor cu ta haciendo menos test e cifra a baha, siendo DVG a bisa cu e cantidad di test nan haci a keda stabil, asina e mandatario a expresa.
E mandatario a menciona cu ya caba a test mas di 17 mil persona na e test center desde 11 di maart. Aruba ta un di e paisnan na mundo cu a haci mas test per capita, compara cu paisnan den region nos ta esun cu a test mastanto. E mandatario a segura cu tin suficiente test kit den stock y esaki ta wordo controla y maneha pa LAB HOH, pa asina haci e besteling na tempo pa garantisa cu semper tin test. Esaki ta conta pa e “Personal protective equipment” tambe y e remedinan, tur esaki ta puntonan cu ta bin dilanti den e “vier landen overleg” hunto cu Hulanda, Corsou y Sint Maarten. Minister Oduber ta informa Sra. Wyatt-Ras cu tin suficiente ventilador den HOH pa y ainda Hulanda por yuda Aruba cu 6 mas si esaki ta necesario. Minister Oduber ta conseha e Parlamentario pa sigui noticianan local mirando cu tur e contestanan aki ta informacionnan cu a bin dilanti den noticia.
Minister Dangui Oduber a expresa cu prioridad pa su persona ta pa maneha e crisis y despues contesta preguntanan cu por wordo contesta pa profesionalnan y cu hopi biaha ta informacion publico. E mandatario ta satisfecho cu e cifranan di e casonan activo ta bahando y ta pidi pueblo pa keda disciplina y sigui e protocolnan cu tin. E mandatario a menciona cu 2 siman pasa tabata tin 1600 caso activo awor esaki ta 727 caso activo, e cantidad ainda ta halto pero nos ta riba e bon caminda.
Nos a pone como meta pa reduci e cantidad di casonan positivo pa dia na 30 cual ta un nivel cu nos por maneha y cu no ta pone presion riba nos capacidad di cuido na hospital y tampoco riba nos departamento di salud publico.
Hunto nos lo logra sali for di e crisis aki.
