ORANJESTAD,Aruba
E crisis di Covid-19 su consequencianan pa nos economia y turismo ta devastador. No obstante e situacion dificil aki ta di sumo importancia pa Aruba cuminsa prepara pa bounce bek. Nos turismo a sufri enormemente y awor ta momento pa nos cuminsa prepara pa e siguente fase di recovery.
Ainda no ta cla ainda ki dia exactamente nos lo dicidi pa habri frontera nos sa cu Aruba lo habri bek di nobo pa negoshi y turistanan. Como cu turismo ta e pilar di nos economia, ministerio di turismo hunto cu A.T.A. a bin ta traha riba un plan di recuperacion, conhuntamente cu AAA, AHATA, y ATSA. Lo comparti mas di esaki cu esnan concerni. Tambe A.T.A. lo continua cu su parti (rol) integral di e proceso nacional cu ta enfoca riba e Recuperacion Economico, cual tin un priorisacion halto.
A desaroya e asina yama ‘Tourism Recovery Marketing Plan (TRMP)’ (Plan di Mercadeo pa Recuperacion di Turismo). E plan aki ta presenta diferente oportunidad cu ta mustra varios scenario y loke nos por logra hunto y kico ta e enfoke awo y kico lo sosode manera Aruba habri su frontera. Independientemente con nos futuro lo sigui desaroya, e ta crucial cu nos por reconstrui nos producto turistico teniendo cuenta cu entre otro e estudio di capacidad di carga y accionnan pa proteha nos naturalesa y nos patrimonionan cultural –entre otro.
Nos mester prepara nos mes pa cuminsa atrae bishitantenan y sigura cu e placa di turismo lo bolbe den nos economia. Mester ta prepara pa cu esaki localmente. A.T.A. conhuntamente cu socionan ta dedica atencion na programanan specifico dedica na crea e ‘normanan’ nobo pa por opera y ofrece servicio. Pensa aki riba e importancia di saneamento y higiena. Pero tambe riba con negoshinan lo atende cu ‘social distancing’. Sin por brinda e confiansa y e siguridad aki na nos bishitantenan, no por habri bek. Di otro banda pasonan ta ser discuti y evalua di e pasonan cu aerolineanan y barconan crucero lo tuma pa cu e topiconan menciona. Hecho ta cu criteria di entrada pa nos isla ta sumamente importante.
Nos ta trahando hopi duro riba e plan aki pa di e forma aki nos bounce bek mas fuerte cu nunca. Nos ta convenci cu pronto nos lo cuminsa recover, e lo tuma tempo pero tin confianza cu nos turismo semper a mustra e forza di por bin bek mas fuerte.
