Dialuna atardi Minister di Turismo y Salud Publico sr. Dangui Oduber conhuntamente cu Minister di Finansas y Cultura sra. Xiomara Maduro a atende un ceremonia hopi importante pa Aruba su turismo como tambe su cultura y herencia. Kapel di Alto Vista ta ricibi su seyo oficial y ta bira e prome monumento priva & protehi cu un plan di embeyecemento na e prome quartal di 2024.
E tabata un atardi ameno cu un bunita misa di Santo Sacrificio dirigi pa Monseigneur L.A. Secco cu un programa unda Minister Oduber y Minister Maduro y tambe representante di Monumenten Bureau Aruba a hiba algun palabra di e historia y a accentua e importancia di Kapel di Alto Vista pero tambe e plan di restructuracion y e rekesitonan pa ta un monumento priva y protehi.
Minister Oduber a hiba algun palabra splicando e plan di embeyecemento y kico tur lota den plan pa asina crea un miho strucura pa e area di Alto Vista. E bunita proyecto aki ta pa asina por organisa y mantene e area cu trankilidad y paz pa tur cu ta bishita y hasi nan oracionnan na e Kapel di Alto Vista.
Mandatario a menciona cu e proyecto ta den su prome fase di restructuracion y tur loke ta bay ta den plan pa implementa ta lo siguiente:
• Percurpa pa amplia e espacio di parkeo y lo tin un area aloca special pa parkeo di
busnan, ATV’s y UTV’s.
• Lo bay prohibi ATV’s, UTV’s y busnan cu tocamento di musica halto den e area pa
asina mantene e paz y trankilidad pa e usuarionan.
• Ta bay embeyece e area rond di Kapel y tambe construi bañonan.
• Ta bay tin regla & guia di bishita tocante vestuario
• Mas accesibilidad pa nos invalidonan
• Implementa proteccion di e propiedad
• Mantena un plan di sostenibilidad
Finalmente, Minister Oduber ta gradici tur persona cu a juda pa hasi e proyecto aki un realidad; Parokia di Noord, Obispado, Minister Xiomara Maduro, Monumenten Bureau
Aruba y tur departamento di gobierno pa asina por a traha hunto y mantene e vision pa asina crea e area di Kapel di Alto Vista, un area di trankilidad & paz pa tur nos
bishitantenan.
