Diahuebs den conferencia di prensa Minister di Turismo, Salubridad Publico y Deporte Sr. Dangui Oduber a elabora riba e restructuracion di e departamento di Ibisa. E departamento di IBISA cu antes tabata conoci como Idefre lo resorta bek bou di Ministerio di Deporte manera e tabata tempo cu e tabata yama Idefre asina e mandatario a trece dilanti.
Tempo departamento di IBISA a keda renombra pa ex Minister Visser a introduci un unidad di salud y e departamento a keda resorta bou di Ministerio di Salubridad Publico. Awor cu e cambio introduci pa Minister Oduber e unidad di promove salud lo bay resorta bou di departamento di Salud Publico y IBISA lo bay enfoca ful riba promove deporte den nos comunidad. Minister Oduber a menciona si cu e unidad di promove salud y esun di promove deporte lo sigui traha estrecho cu otro pero cada un cu nan respectiva enfoke. Segun e mandatario di e manera aki ta centralisa e enfoke di cada un di e departamento nan aki pa asina nan traha na un manera mas eficiente.
Proyecto nan di Ibisa 2021
Hoben Activo Hoben Feliz
Aña pasa IBISA a cuminsa cu un proyecto piloto cu ta tuma lugar den barionan pa asina stimula participacion activo di nos hoben nan den deporte. HAHF a cuminsa na San Nicolas y a sigui tambe na Dakota y a keda bon bishita pa nos hoben nan. Proyecto HAHF ta kita hoben nan for di riba caya, promove deporte despues di orario di scol y pa incorpora un bida mas saludabel den nos hoben nan. E proyecto di HAHF a resulta di ta exitosa y pa es motibo na 2021 e lo continua y expande pa barionan di Oranjestad, Brazil, Santa Cruz y Noord.
Website di Deporte
E website lo yama www.deporte.aw y aki riba lo sali tur resultado di tur deporte. Tambe cada deportista lo tin e acceso pa wak y midi nan prestacion a base di estadisticanan cu lo keda publica riba e website aki. E mandatario a splica cu actualmente ta den contacto cu tur e federacionnan pa asina haya tur e datosnan di awor en adelante, e proyecto aki ta andando.
Ley di Deporte
Ya a cuminsa cu e prome pasonan pa bin cu e ley di deporte, a sinta cu IBISA, Comite Olimpico y diferente federacionnanpa asina prepara e ley aki. E ley di deporte lo percura pa regula pa un deportista haya su dianan pa e por participa na e trainingnan y tambe e evento regla den un ley. E ley aki ta solamente pa deportista cu ta participa na evento di alto nivel manera Olimpiada, weganan Panamericano etcetera. Actualmente Gobierno ta brinda e posibilidad aki via “bijzondere vrijstelling van dienst” (bbvd) pero esaki hopi biaha no ta cubri e trayecto di preparacion, ta cubri e dianan di e evento solamente. Minister Oduber a menciona cu su persona lo kier brinda e oportunidad na e atletanan pa nan por prepara mas mihor pa asina duna un mihor prestacion.
Sport Raad
Minister Oduber a menciona cu lo bay institui un Sport Raad na Aruba pa prome biaha den historia. Departamento di IBISA ta hunga un rol hopi importante den esaki hunto cu tur e federacionnan deportivo. Esaki lo percura pa tur stakeholders di deporte ta para riba e mesun liña.
Finalmente e Minister Dangui Oduber a gradici e Management Team nobo di IBISA pa nan trabounan haci den e parti di restructura IBISA y tambe pa e plan di aña 2021
