Den conferencia di prensa Minister di Salud Publico Sr. Dangui Oduber a anuncia e lansamento di e campaña den cuadro di e plan nacional di prevencion di malesanan di NCD’s. E campaña aki ta uno hopi amplio cu lo bay conscientisa y guia e comunidad di Aruba pa hiba un bida mas saludabel. E nomber di e campaña ta “Bo estilo di bida, E mihor medicina”. E campaña aki ta keda completamente financia pa Pan American Health Organization (PAHO) den bon cooperacion cu ministerio di Salud Publico y DVG.
E campaña di “Bo estilo di bida, E mihor medicina” tin como meta pa duna e information necesario y educa nos comunidad tocante habitonan saludabel cu lo mehora nan salud. Den e campaña lo tin programa di salud gratis tambe caminda profesionalnan lo duna e guia necesario na e comunidad.
Minister Oduber a splica cu e campaña aki ta bay purba cambia e habitonan diario di un persona, paso ta e habitonan aki tin e mayor impacto ariba e desaroyo di malesanan no-comunicabel (NCD’s). Lo bay enfoca riba e base pa tin un sistema immunologico mucho mas fuerte. Esaki ta bay conduci cu menos hende lo bay bira malo cu e meta pa baha e cifra di mortalidad a largo plaso. Den e campaña lo bay ofrece guia individual pa diferente necesidad, sea ta fisico, emocional of duna plan di cuminda, lo bay tin profesionalnan disponibel pa cualkier necesidad.
E campaña ta bay consisti di diferente retonan (challenges) di 30 dia cu cualkier persona por participa na dje. E retonan aki lo bay cuminsa na januari di aña 2022 y lo ta enfocando riba 1 cambio di habito saludabel. Lo bay tin guia gratis di un profesional di sector di salud, grupo priva lo por hacie tambe atraves di Facebook.
E retonan (Challenges) ta lo siguiente:
➢ Nutricion Meal Planning Challenge
➢ Movecion Move na bo manera Challenge
➢ Drumimento Bettersleep Challenge
➢ Higiena Higiena diario Challenge
➢ Maneho di Stress Mindfulness Challenge
Pa mas informacion por subi e pagina web di www.arubasaludabel.com
E plan nacional di prevencion di malesanan NCD’s ta un plan di aña 2020 pa aña 2030, pues e ta un plan di 10 aña. Pesey mes e enfoce riba e proximo 4 aña di gobernacion ta basa riba e plan nacional di prevencion aki. Lo bay inverti den e comunidad mirando cu Aruba su poblacion ta den un biehesimento. E plan aki lo bay zorg pa cambia e habito di bida di e comunidad Arubano pa den futuro Aruba tin un fondo di AZV mas sostenibel.
