Dialuna Minister di Turismo y Salud Publico sr. Dangui Oduber a reuni cu entre otro sra. Ronella Croes di ATA, Jisenia Arends di Direktie Milieu & Natuur y sr. Ewald Biemans di Bucuti & Tara Beach Resort. Den e encuentro aki e mandatario a haya tur informacion necesario pa ta altanto locual Fundacion Stimami Sterilisami ta bin ta haciendo pa remedia e situacion di cacho y pushinan riba caya.
Tabata na januari di e aña aki cu a reanuda e subsidio bek pa Fundacion Stimami Sterilisami. Ya pa varios aña caba “Tourism Product Enhancement Fund” TPEF ta e main sponsor di e programa di sterilisacion di e fundacion. E programa di sterilisacion aki ta un colaboracion di sector publico conhunto cu sector priva.
E fundacion aki ta pa yuda cu sterilisacion di cacho y pushi nan di caya y tambe pa yuda doñonan sterilisa nan mascota. E aña aki Aruba Tourism Authority (ATA) tambe ta join pa asina por a restart e programa, esaki ta pa motibo cu door di Covid-19 TPEF mester a stop subsidio temporario. Den aña 2022 TPEF lo sigui sibsidia e fundacion aki una bes mas.
E Fundacion di Stimami Sterilisami ta ricibi subsidio for di TPEF y awor ATA anualmente. Nan ta haci hopi bon uzo di esaki y ta traha na un manera eficiente. Den pasado a traha cu veterinarionan di Aruba, actualmente tin un veterinario for di Merca tambe pa asisti cu e operacionnan. Ta purba pa yega na tarifanan, unda por haci mas hopi operacion cu e mesun cantidad di fondo disponibel.
Minister Dangui Oduber su maneho di turismo no solamente ta dirigi riba target turista di calidad, mehoracion di servicio y upgrading di area turistico pero tambe e ta basa pa crea un balans positivo pa e comunidad di Aruba incluyendo nos amigonan di cuater pia cu no tin un dak riba nan cabes. Stimami Sterilisami como fundacion tin como obhetivo pa yuda e comunidad di Aruba bira mas consciente riba e problematica cu tin di cacho y pushi nan riba caya. Pa añas e fundacion aki ta subsidiando miles di operacionnan di cacho y pushi rond nos isla.
E mandatario ta gradici sr. Biemans di Bucuti & Tara Beach Resort cu ta un patronisador di e programa di sterilisacion mesun importante cu TPEF y awor ATA. Esaki ta debi cu nan ta iguala cualkier suma cu e fundacion ricibi, esaki ta algo cu Gobierno di Aruba ta hopi agradecido pe e mandatario ta expresa.
Minister Oduber ta kere firmemente cu e manera con nos ta trata nos animalnan ta bisa hopi di nos como pais. Abase di programanan asina, den wowo di nos bishitantenan ta eleva e imagen di e producto Aruba y ta cumpli cu e vision di Ministerio di Turismo.
Finalmente Minister Oduber kier gradici ATA, Bucuti & Tara Beach Resort y Fundashon Stimami Sterilisami pa e bon trabou haci durante ultimo añanan.
Nos amigonan di cuater pia sigur tin nos amor y atencion!
