Minister di salubridad Publico Sr. Dangui Oduber ta anuncia cu den cuadro di nos Campaña Nacional di Vacunacion, diasabra y diadomingo awo dia 24 y 25 di april, Aruba lo realisa su prome VACUNATHON! E Vacunathon ta unicamente pa aplicacion di e prome dosis di e vacuna.
E meta di e dos dianan aki ta pa logra vacuna 10 mil ciudadano contra COVID-19. Vacunacion ta un acto di solidaridad y reponsabilidad conhunto. Niun hende por keda atras! Tur persona mester wordo proteha, sea door di tuma e vacuna nan mes of door di e comunidad ora di logra e inmunidad colectivo.
Mirando e desaroyo cu ta tumando lugar cu e virus di COVID-19 caminda a keda comproba cu e variantenan cu tin y principalmente e variante Britanico, ta afectando e personanan mas jong. Gobierno a dicidi pa cambia e enfoke riba e grupo di 18 pa 60 aña mirando cu ya caba a vacuna mas di 60 % di esnan riba 60 aña. Pesey diasabra y diadomingo awo dia 24 y 25 di april ta haci un yamada na henter e comunidad y principalmente esnan entre 18 y 60 aña pa bin na e localidad nan di prik pa vacuna.
E localidad nan di prik ta: Teresita Center na San Nicolas – Centro Libertador Betico Croes – Don Bosco Club na Noord of Ritz-Carlton hotel for di 9or am pa 4or pm ‘NON STOP’.
Nos ta warda bo cu bo carchi di AZV!
