Minister di Turismo y Salud Publico sr. Dangui Oduber semper a hiba un bida cu hopi actividad fisico. Movecion ta hopi importante pa tin un bida mas saludabel. Pa e motibo aki Minister Oduber kier promove movecion den den nos comunidad.
Aruba tin su plan nacional di prevencion y recien na januari a tuma lugar e apertura di “Healthy Lifestyle Center”. E centro aki ta specialmente dirigi pa yuda tur persona cu ta riba 18 aña con pa hiba un bida mas saludabel. Nan ta duna guia manera plan di nutricion, plan di ehercicio y na forma gratis.
Manera ta conoci “World Health Organization” ta conseha pa participa na un actividad deportivo minimo 30 minuut pa dia pa por tin un bida mas saludabel. Minister Oduber ta kere den conscientisacion, e ta hopi importante pa yega na e meta pa baha e cifra di mortalidad y pa tin un comunidad mas productivo.
Awendia cosnan ta mucho mas moderno y nos tin hopi mas herment na nos desposicion cu por yuda nos ta mas consciente di nos movecionnan diario. Tin diferente aplicacionnan riba nos cel cu por duna nos guia riba movecion segun nos edad.
Un di e maneranan cu bo por calcula bo mes ta na e cantidad di stapnan cu nos ta tuma pa dia. Ta recomendabel pa tuma un promedio di 10 mil stap pa dia pa tin un bida activo. Algo cu facilmente bo por controla via un “smartphone” y/of un “smartwatch” segun Minister Oduber.
Minister Oduber ta spera cu e articulo aki por yuda na conscientisa nos comunidad riba e importancia di hiba un bida cu hopi actividadnan fisico. Un habito chikito cu bo por aplica den bo dia diario por tin un efecto positivo grandi pa bo pais.
