Minister Dangui Oduber: E estudio di “dokterassistent” MBO un biaha mas ta disponibel na Aruba

Den cuadro di mehoracion den cuido Minister di Turismo y Salud Publico sr. Dangui Oduber ta anuncia cu a percura un biaha mas pa Aruba tin su propio estudio di “Doktersassistent”. Maneho di Minister Oduber ta dirgi riba mehora e calidad di cuido y servicio, haci inversionan den cuido y percura pa nos reenforsa e prome linea di cuido.

Recientemente a bira posibel atrobe pa e assistent di dokter por haya nan MBO diploma den “Doktersassistent” aki na Aruba mes. Minister Oduber a duna di conoce cu esaki ta un iniciativa di HAVA cu ya pa algun tempo caba nan tabata purba pa cuminsa cune pero door di e landspakket y e cortamento di 60 miyon florin pa aña den cuido esaki no tabata posibel. Esaki a bira posibel awor danki na e palabracionnan cu Minister Oduber a haci na aña 2022 cu e “Tijdelijke Werkorganisatie” (TWO) durante e tratamento di e “Landspakket”. A mustra TWO riba locual ta e “roadmap” y a pone e estudio aki como un prioridad. Esaki a conduci cu awe AZV a reserva e fondo pa asina aporta na e proyecto importante aki, caminda ta crea e posibilidad pa profesionalisa aun mas e rol di assistent di dokter.

Pa haci esaki posibel HAVA a acerca Colegio EPI Aruba y ROC Mondriaan College Den Haag cu e proposito pa por logra ofrece e estudio di “Doktersassistent” aki na Aruba. E estudio di MBO aki lo tin un duracion di 2 aña y e programa lo wordo coordina pa Colegio EPI mes y lo duna les conhuntamente cu e dokternan di cas, specialistanan y otro profesionalnan den cuido. Actualmente tin un grupo di 18 assistent cu ta atendiendo e estudio aki.

Como parti di e ekipo di un consultorio, e assistent tin un rol clave den con e consultorio ta funciona. Nos assistentnan ta competente y capacita pa determina e urgencia door di haci pregunta na e pashent segun e sistema di triage. Tambe nan mes por haci cierto trabou nan, manera paptest, inyeccion, cuido di heridanan pa menciona algun.

Minister Dangui Oduber semper a sostene iniciativanan cu ta aporta na mehoracion di e calidad di cuido y servicio aki na Aruba y un biaha mas esaki a keda demostra. Minister Oduber kier a gradici AZV pa e parti financiero y HAVA pa bin cu e iniciativa, tambe un danki na Colegio EPI y tur e profesionalnan cu a aporta na e proyecto aki. Finalmente Minister Oduber kier a desea e grupo di 18 assistent tur clase di exito den nan estudio.