Den cuadro di diversificacion Minister di Turismo y Salud Publico sr. Dangui Oduber ta comprati cu e aerolinea Sarpa ta aumenta nan vuelonan pa Aruba. Sarpa lo bay ta operando 3 vuelo semanal for di Medellin Colombia entrante 21 di juni. Sarpa a cuminsa opera na Aruba apenas na januari di e aña aki.
Actualmente e aerolinea ta operando 2 vuelo semanal riba diaranson y diadomingo pero entrante 21 di juni e lo ta operando 3 vuelo semanal riba diamars, diahuebs y diadomingo. E avion cu Sarpa ta uza ta un avion estilo jet, esta un Embraer 145 cu tin un capasidad di 50 asiento.
Minister Dangui Oduber ta satisfecho con Aruba su turismo ta desaroyando, e di dos (2) kwartal ta bayendo hopi bon y e di tres (3) kwartal tambe ta mustra di bira uno hopi prometedor. E aumento di vueolo di Sarpa ta bay haci cu lo bay tin un aumento den e “airlift” di Latino America pa Aruba. Ya caba ta premira cu lo tin un cresemento for di e mercado aki mirando cu e aerolinea Wingo tambe a caba di aumenta su vuelonan semanal for di Bogota dia 14 di juni, asina e mandatario a trece dilanti.
Minister Dangui Oduber a duna di conoce cu diversificacion di rutanan den latino America ta cuadra cu e maneho di Gobierno. Minister Oduber ta hopi satisfecho cu e trabou cu e airlift committee ta haciendo. Ban sigui avansa hunto como pais pa como pais nos yega bek na 100 porciento di recuperacion di nos turismo compara cu aña 2019.