Minister di Salubridad Publico Sr. Dangui Oduber ta e mandatario encarga cu cannabis medicinal. Na aña 2017 na momento cu a forma Gobierno, a bay di acuerdo den gobernacion entre MEP-POR-RED cu lo bay sondia e posibilidadnan pa importa, cultiva y bende productonan di CBD y cannabidiol. E mandatario a menciona cu e ta kere den e industria di importacion di productonan di cannabidiol.
E mandatario a expresa cu Aruba ta un di e poco paisnan na mundo y den caribe cu tin un vision progresivo pa cu cannabis medicinal. Na aña 2019 caba Ministerio di Salubridad Publico a duna diferente permiso na diferente companianan local pa importa productonan cu ta contene CBD. Minister Oduber ta hopi satisfecho cu ya caba varios di e gruponan aki ya caba a importa e productonan y esakinan ta riba mercado. E productonan di CBD y cannabidiol ya caba ta yudando diferente pashentnan cu tin diferente malesa den nos comunidad.
Minister Oduber a bisa cu Aruba ta percurando pa diversifica su economia cu e industria nobo di cannabis. Na mes momento Gobierno ta den e finalisacion di e proceso pa bay otorga permiso pa cultivacion, procesamento y exportacion di cannabis medicinal y asina aki Minister Oduber ta mustra di tin un pensamento di diversificacion di nos economia. Esaki ta algo cu den pasado nunca a logra, semper pais Aruba su economia a depende grandemente sea riba turismo of refeneria. Awor aki e Gobierno aki ta demostrando cu e industria di cannabis medicinal por crea cuponan di trabou, por crea entradanan pa Gobierno y por stimula economia. Pa es motibo Minister Oduber ta hopi satisfecho cu ya caba e productonan cu ta contene CBD ya caba ta obtenibel na diferente boticanan y lugarnan cu ta bende supplement.
Finalmente Minister Dangui Oduber ta conseha pueblo pa educa nan mes riba e materia. Lesa kiko tur por ta e beneficio di e productonan aki y tambe kiko por ta e posibel side effect cu e productonan aki por tin.
