Diaranson e departamento di Salud Publico, muy en especialmente e unidad di Jeugdgezondheidszorg (JGZ), a conmemora nan 105 aña di aniversario. Den e ceremonia aki tabata presente Gobernador di Aruba su Excelencia Alfonso Boekhoudt como tambe Minister di Turismo y Salud Publico Sr. Dangui Oduber. Esaki a tuma lugar den e conference room di ex scol di JFK na Playa. Durante e ceremonia aki nos Gobernador y Mandatario a haya un presentacion amplio di e trabounan cu JGZ ta haci pa nos muchanan.
Nan ta e departamento cu ta zorg specialmente pa e salud fisico, mental y emocional di nos muchanan na Aruba. JGZ ta bishita scolnan regularmente, esaki ta haci cu den casonan por ehempel di violencia domestico y/of maltrato di un mucha nan por indentifica esaki hopi trempen. Tambe JGZ ta percura pa administra diferente vacunanan na nos muchanan. Banda di esaki nan ta duna informacionnan riba con pa hiba un bida mas saludabel y duna conseho pa participa activamente den movecion.
Minister Oduber a menciona cu JGZ ta un unidad hopi importante pa e desaroyo di tur nos muchanan di 0 aña te cu 19 aña di edad. E mandatario a sigui bisa cu den JGZ su vision nan lo kier inverti mucho mas den prevencion, esaki ta cuadra tambe cu e maneho cu Minister Oduber ta hiba. Manera ta conoci tin un plan nacional di prevencion cu tur stakeholders den cuido ta participa den dje conhuntamente cu PAHO. E maneho cu ta ser ehecuta actualmente y den e 4 añanan di gobernacion ta basa riba e plan nacional di prevencion, asina e mandatario a trece dilanti.
Durante e presentacion di JGZ nan a duna diferente cifranan di salud di nos muchanan, pero locual tabata hopi remarcabel pa Minister Oduber tabata esun di obesidad. Segun cifranan, e obesidad bou di e muchanan den 5de y 6de klas ta 45%. Minister Oduber a remarka cu Ministerio ta bay bin cu un clinica pa atende cu e problema di obesidad cu ta biba den nos comunidad.
Minister Dangui Oduber ta contento di por a presencia e bunita presentacion cu a keda duna. Finalmente e mandatario ta felisita henter e ekipo di JGZ den e celebracion di 105 aña di aniversario. Danki tambe na Gobernador di Aruba su Excelencia Alfonso Boekhoudt pa su presencia.
