Minister di Turismo y Salud Publico Sr. Dangui Oduber ta sumamente orguyoso cu pais Aruba a destaca y gana premio international den exterior pa locual ta trata e Aruba Health App. E conferencia tabata e di 15 edicion di e “European Identity and Cloud Conference ” cual a tuma luga na Berlin den e siman di 12 di Mei 2022.
Aruba Health App a wordo crea durante e pandemia di COVID-19 pa facilita e proceso di test y tambe pa centralisa informacion di cada pashent di un manera optimal, digital y accessible pa tur hende den comunidad di Aruba. Sociedad International di Telecomunicacion Aeronautico (SITA) a wordo reconoci pa e implementacion di un sistema asina innovativo y unico, pa locual ta trata e credencial di pasaheronan biahando pa Aruba. Tur e pais nan cu ta destaca den e industria aki tabata presente na e conferencia aki. Durante e ceremonia diferente pais manera Chile y United Kingdom a gana premionan, di cual Aruba tambe tabata un di nan cu a wordo elogia. Segun e compania di analysis Global KuppingerCole, e uzo di e sistema di Aruba “ta un solucion caminda cu pasaheronan por presenta nan dato nan personal di salud na aerolinea, hotel y tur e partner nan den e industria di hospitalidad den un forma priva y sigur”. Ta importante pa pone enfasis riba e hecho cu Aruba, un pais asina chikito, tabata un ehempel pa diferente paisnan mas grandi, cual a opta pa implementa e sistema aki tambe despues cu nan a wak con eficiente e aplicacion aki ta.
Minister Dangui Oduber ta gradici tur e stakeholders nan cu a participa den creacion di e Aruba Health App, cual a promove Aruba internacionalmente. Palabranan di danki na e participantenan cu ta DVG, LabHOH, AAA, ATA, Imigracion Aruba, DCA, AZV, SETAR, Gama & SITA. Un danki tambe na Hilton Hotel Aruba, Butterly Farm Aruba y Lola Taqueria cu a yuda grandemente cu e proyecto piloto aki.
E bienestar di nos pueblo ta Minister Oduber su prioridad y e lo sigui hasi tur cos necesario pa cumpli tur e metanan. Danki un biaha mas pa tur e esfuerso durante e pandemia y hunto nos ta sigui bay dilanti. Nos lo sigui traha pa saca cara di Aruba mientras nos ta cuida nos mes y cuida otro.
