ORANJESTAD,Aruba
Diahuebs mainta Minister di Turismo, Salubridad Publico y Deporte Sr. Dangui Oduber a ricibi e organisacion di Caribbean Med Labs Foundation y representante di Departamento di Salud Publico. Conforme cu e vision di Minister Oduber riba e tereno di hisa calidad di servicio, Minister Oduber a cuminsa cu un trayecto pa sigura e calidad di servicionan di laboratorionan na Aruba.
Minister Oduber ta haya cu ta importante pa como Gobierno bo tin un maneho delinea y stipula na kico laboratorionan mester cumpli cune. Esaki ta pa asina por sigura cu e resultado di cada test ta uno confiabel y valido conforme reglanan international. Tambe e ta importante cu cada pashent ricibi un diagnosis cu ta basa riba resultadonan confiabel, di cual 70% pa 80% di e tratamento ta basa. Solamente a base di resultadonan confiabel y cifranan concreto ricibi, Gobierno por tuma e decision corecto. Ta abase di esakinan Gobierno por bin cu programanan di prevencion y monitor e salud publico di Aruba den su totalidad. Como pais e ta nos deber pa hisa, sigura y mantene nos calidad di servicionan riba un nivel halto, segun e mandatario.
Den cuadro di prevencion Aruba pronto lo conta cu un plan nacional di prevencion, pesey ta importante pa tur laboratorio mantene un calidad di servicio halto. “Como Minister di Salud Publico mi ta compromete mi mes pa sigui traha duro pa sigui mehora nos calidad di cuido medico, sigui enfoca riba mehoracion di accesibilidad di cuido medico y mas importante pa mantene e fondo di AZV sostenibel” asina e mandatario a expresa.
