Minister Dangui Oduber ta kere cu IMSAN tin un bunita logro y grandi pa cuido medico pa tur e aseguradonan, gobierno di Aruba por a entrega 4 ambulance nobo cu ta un inversion di 3.2 miyon florin.
E anuncio aki a keda haci di aña pasa januari y ta contento cu awe por a haci entrega di e 4 ambulance nan mirando cu e proceso a tuma su tempo debi cu na caminda a haya contratiemponan. E maneho cu gabinete Wever Croes a bin ta hibando den e ultimo añanan a enfoca riba calidad di cuido y servicio unda cu a percura pa haci inversionnan continuo y percura pa e gasto nan di AZV keda manehabel y keda sostenibel unda cu ta inverti den e pension.
Minister Dangui Oduber ta kere cu e compra di ambulance ta e muestra di e maneho cu a duna resultado di haci inversionnan den cuido. Nos no mester lubida cu e inversionnan aki por wordo haci danki na e cuido cu ta traduci su mes den crecemento economico cu na su turno ta traduci su mes den mas entrada pa AZV.
Esaki tambe ta pone cu tin mas espacio financiero pa inverti den cuido. Den e ultimo añanan aki a inverti mas cu 100 miyon florin den IMSAN unda cu a bin cu e miho centro di radio terapia den henter Caribe unda cu mas di 1000 persona a haya bestraling caba na Aruba enbes cu nan a haya bestraling den exterior.
E bunita di esaki ta cu e persona cu mester haya bestraling ta keda den su ceno familiar y por haya su tratamento di bestraling. Minister Dangui Oduber ta duna di conoce cu na momento cu a drenta gobierno a haya IMSAN den un situacion di 22 cama cu no tabata den uzo y asina a inverti 22 miyon florin pa haci e camanan operacional y awe por bisa cu e camanan ta keda uza optimalmente y esaki sigur ta algo positivo pa Aruba.
Minister Dangui Oduber ta hopi contento cu por a cumpli cu e maneho unda cu a pone inversionnan conforme e prioridadnan cu tin pa mehora e calidad di IMSAN mas ainda.
