Casonan na Aruba ta subiendo cu un rapides cu nos yun no a spera. Sinembargo esaki ta abase di e mes un comportacion di nos mes como ciudadano. Ayera por a mira un biaha mas Aruba tin 2 morto local y un turista cu a fayece. Sigur esaki no ta un bon señal pa nos bishitantenan cu ta bin for di exterior pa pasa vakantie na Aruba y asina tambe contribui pa nos economia por sigui drey aki na Aruba cu ta bon pa nos tur.
Minister di Salubridad Publico Dangui Oduber den un conferencia di prensa ta duna di conoce cu e situacion actual di COVID -19 na Aruba ta keda uno di preocupa. Actualmente Aruba ta riba mil caso activo. Sinembargo Aruba a maneha e cantidad di casonan aki na Aruba caba, pero e diferencia ta si cu den pasado tabatin mas personal presente debi na e presencia di personal di Hulanda. Un cantidad di 60 personal di Hulanda a bin Aruba pa asina reenforsa e personal di Aruba den ICU y den e cambernan di COVID.
Actualmente Aruba no tin e cantidad grandi di personal mas actualmente. Na momento cu e cantidad di casonan a bay na juni a baha e cantidad di personal cu tabata di Hulanda y na unda cu Aruba a sigui riba su mes y hospital tabata practicamente bao di control. Debi na e echo cu a bin e variante Delta Aruba a mira un aumento substancial di casonan y esaki a pone cu mester a bay busca yudansa atrobe pa yuda na Hospital. E yudansa a yega Aruba y nan ta reenforsando hospital na e momentonan aki.
Segun minister di salubridad publico Dangui Oduber e situacion ta keda uno di preocupa. Actualmente tin 9 persona den ICU, 12 persona interna den ICU na Colombia cu mester a keda transporta cu Airambulance , 43 persona den e departamento di COVID, 1 persona den departamento di maternidad unda cu total tin 65 persona interna sea na Aruba y Colombia.
Den esnan cu ta na hospital interna tin 38% persona cu ta sufri di presion halto, 31% ta diabetico,7% ta pashent di dialyse, 4% problema cu curason,3% tin cancer y banda di esaki 28% ta pre obies y 42% ta obies. esaki ta significa cu nan no ta personanan di mas saludabel lamentablemente. Esaki ta ocasiona apesar cu e persona ta vacuna ta haya nan mes cu complicacion cu nan salud debi na e echo cu ya caba nan tin complicacion cu nan salud cu diferente malesanan. E vacuna ta yuda e personanan aki pero naturalmente door di nan condicionnan fisico nan ta wordo interna na hospital y dadocaso tin di nan a keda interna di ICU unda cu algun ta riba 60 aña.
Desde cu e vacuna a yega Aruba gobierno di Aruba a pone hopi enfasis di e importancia pa recomenda mas y mas hende tuma e vacuna. Gobierno di Aruba a keda satisfecho di e cantidad di persona cu a haci uzo di e oportunidad pa bay vacuna, pero te na e momentonan aki ainda no a logra yega na e meta ainda cu gobierno a pone su dilanti na momento a cuminsa cu e programa di vacunacion algun luna pasa.
E data di informacion di hospital ta mustra cu 29% di esunnan cu no ta vacuna riba 18 aña ta causante di 82% di tur esunnan cu ta hospitalisa, ta causante di 87% di esunnan cu ta den ICU y ta causante di 77% di e mortonan di COVID. Tur esakinan ta personanan riba 18 aña cu no a tuma nan vacuna. Esaki ta e cifranan cu ta demostra cu na momento cu bo tuma bo vacuna e ta yudabo y ta preveni cu bo ta hospitalisa of e ta preveni cu bo ta bira asina malo cu hasta ta yega pa keda interna den ICU.
Minister di Salubridad publico Dangui Oduber ta anuncia debi na e demanda gobierno di Aruba ta organisa e di tres vacunaton 3.0 pa diadomingo awo dia 22 di augustus den ballroom di Ritz Carlton di 9 or di mainta te cu 4 or di atardi . E meta cu a pone nos dilanti ta pa logra vacuna entre 2000 cu 2500 persona riba e dia aki. Minister di Salubridad publico ta haci un apelacion special na tur hoben riba 12 aña cu ainda no a vacuna y tambe tur adulto cu pa un motibo of otro no a vacuna ainda pa haci uzo di e oportunidad aki
Minister Dangui Oduber : 29% di esnan cu no ta vacuna riba 18 aña ta causante di 82% di tur esnan cu ta hospitalisa
