Awe 20 December 2021 a duna informacion over e situacion y caso nan di Covid19 aki na Aruba. Akinan na Aruba tambe a detecta e variante Omicron, locual tawata uno inevitabel.
For di comienso di e crisis y te cu awor, cu tin mas experiencia manehando e crisis, gobierno ta mantene e strategia cu si Aruba por mantene un averahe di menos 30 caso nobo pa dia, ta bisa cu e caso nan ta bow control. Paso caso nobo bow di 30 pa dia ta un cifra cu departamento di salud publico y e capacidad di hospital por traha cune. Pesey ta keda depende di e situacion di hospital pa asina dicidi ki medidanan en cuestion di Covid19 mester wordo ahusta. Maske cu e caso nan ta subiendo leve, ainda Aruba por bisa cu e situacion ta bow control, paso e casonan nobo ta menos di 30 pa dia.
E gobierno di Colombia y Merca a tuma e decision cu nan no lo admiti ningun pashent di Aruba cu no ta vacuna. Dus ta bira un problema pa si e persona bira malo na Aruba door di Covid of door di cualkier otro malesa y mester wordo manda afor pa su salud. E ora e pasinan Colombia y Merca no lo ta un opcion. E exigencia aki ta un decision cu Colombia y Merca mes a tuma como pais. Ta importante pa Aruba ta na altura awor di e exigencia aki y e consequencianan cu esaki por tin. Esaki sigur por trece retonan grandi cune y por ta peligroso pa esnan cu ainda no a vacuna.
E vacuna ta keda duna resultado y nos ta urgi esnan cu ainda no a tuma esaki, pa tuma esaki mas pronto cu ta posibel. Walk-in pa vacuna na Centro Deportivo Betico Croes, na Santa Cruz a wordo extendi te cu dia 21 di December. Otro aña lo sigui duna vacuna y boostershot den luna di januari. Minister ta conseha tur hende cu no a vacuna pa haci esaki, e ta pa bo mesun salud.