Recientemente e Titular di e Cartera di Transporte, Comunicacion y Sector Primario, sr. Chris Romero, a oficia un reunion informativo cu Fundacion Piscadornan di Barcadera. Dicho fundacion a keda institui cu e intencion pa preserva y cuida interesnan di mas cu 30 piscador cu ta haci uzo di, entre otro, 3 pier, “Rancho di Nel”, Centro di Pesca y etc.
E reunion aki a bay den un ambiente hopi positivo, unda cu a splica Minister Romero riba e plannan pa futuro di e Fundacion. A presenta na Minister e historia di Rancho Bethel (Rancho di Nel), cu a keda funda na aña 1992 y otro aña lo ta celebrando su di 30 aña di existencia, trahando semper na beneficio di nos piscadornan.
Tambe a pidi coperacion y apoyo for di Ministerio di Sector Primario pa yuda e piscadornan di Barcadera. Y aki Minister Chris Romero, como piscador su mes, a expresa su disponibilidad pa apoya y yuda Fundacion Piscadornan di Barcadera.
