ORANJESTAD, Aruba
Minister Adin Bikker a yama un conferencia di prensa pa clarifica algun punto cu a keda papia den parlamento cu no ta cuadra cu berdad y cu ta atacha su mes y su integridad. Minister Bikker a cuminsa splicando pa locual ta e situacion cu a sosode awe durante dia unda cu trahadornan di GNC a bay den portesta pa cu falta di personal y falta di material na nan lugar di trabou. Minister Bikker a splica cu e si ta na altura pa locual ta pasando na GNC y e ya tin lunas ta trahando hunto cu su staf pa mehora e situacion pero no por kita e hecho cu un di a causantenan primordial pa cu e situacion na GNC ta cu fronteranan ta sera pa venezuela pa basta tempo caba cual ta causa cu e detenidonan na GNC no por wordo manda bek pa Venezuela. Minister Bikker tambe a aclaria su posicion pa locual ta e projecto di container cu tambe ta un di e puntonan cu a ser menciona durante e reunion na parlamento ayera. Como un persona experiencia cu 2 titulo den ley Minister Bikker a declara cu e ta mas cu apto pa sa cual decisionnan e por tuma como Minister.
Durante e reunion den parlamento hopi a wordo bisa y hopi acusasionn y insuancionan a wordo manda pa Minister Bikker, tur cual segun e mandatario ta sin base y completamente incorrecto. Minister Bikker a remarka cu asta e accusasion nan di e Minister di Husticia anterior Sr. Dowers a bin cu acusacion siendo cu e mesun Minister anterior tambe a yega di uza e mesun grupo aki di comerciante pa projectonan sin bay destaho publico.
Pa locual ta e punto tresi dilanti di Parlamentario Howell a wordo puntra na Minister si e ta di acuerdo cu e ponencia di Sr. Howell bisando cu sea Minister Marisol Lopez Tromp ta wordo kita como Minister of ta manda Gobierno cas. Minister Bikker a bisa riba e punto aki cu e ponencia di Sr. Howell a wordo tuma for di contexto y cu e tawata simplemente un punto riba un splicashon amplio cu Sr. Howell a duna.
Pa locual ta sr. Bikker su opinion riba e reunion di ayera e ta haya lamentabel cu Minister Marisol Lopez-Tromp a bin cu un forma arrogante y bira varios punto y topico na su fabor. Pa locual ta e futuro di Minister Marisol Lopez-Tromp den partido POR no tin futuro segun Minister Bikker.
