Den stadhuis di Amsterdam a tuma lugar e siman aki un recepcion pa e studiantenan di Curaçao, Boneiro, y Aruba. Normalmente e recepcion aki ta tuma lugar den luna di augustus net despues cu e studiantenan yega Hulanda, pero debi na COVID 19 a schuif e fecha na luna di oktober. Na stadhuis di Amsterdam loco burgemeester Egbert de Vries a yama tur e studiantenan bon bini.
E recepcion a conta cu presencia di Minister Plenipotenciario Guillfred Besaril, Minister Plenipotenciario di St. Maarten Rene Violenus, representante di Cas di Corsow Ann Philipps y mentornan pa Amsterdam Lourdes Bramble-Tromp.
Den su discurso na e studiantenan sr. De Vries a bisa di ta contento cu e studiantenan a scohe pa bin biba y studia na Amsterdam. E politico a bisa cu e tin comprension pa e adaptacion cu e studiante ta pasa aden awor cu nan ta Hulanda, pasobra como mucha ela biba na Curaçao y mester a custumbra ora ela bin biba bek na Hulanda. E mandatario a sigi papia riba e diversidad di Amsterdam como ciudad cu ta pone cu bo ta topa personan di diferente continente. Su conseho ta tambe pa cera amistad pafor di bo mes un comunidad pa asina enrikece bo experencia cu otro culturanan. Loco burgemeester De Vries a referi den su discurso na e historia di Amsterdam cu ta conecta cu esun di e islanan Caribense, principamente pa cu e tema di sclavitud. ‘Mirando e rol cu e gobierno di Amsterdam a hunga den sclavitud a conduci cu e aña aki burgemeester Halsema durante e Conmemoracion Nacional pa Abolicion di Sclavitud riba prome di juli a pidi disculpa pa e rol cu e gobierno di Amsterdam a hunga den sclavitud, asina e loco burgemeester a bisa.
Sr. De Vries a bisa cu e ta spera cu lo tin hobennan cu despues cu nan caba cu nan estudio nan regresa nan isla pa asina contribui cu nan conocemente na desaroyo di e islanan. Por ultimo sr. de Vries a desea a hobennan exito cu nan studio y a avisanan pa cu si nan tin problema nan busca ayudo pa asina logra termina e estudio cu exito.
Minister Plenipotenciario Guillfred Besaril a felicita y gradici Amsterdam pa a organisa e evento aki pa nos studiantenan y a comparti su experencia como studiante cu e hobennan. Sr. Besaril a bisa cu ta importante pa mantene bo identidad, mientras cu bo mester busca camindanan pa haya un rol pa bo den e sociedad aki. ‘Banda di mi amistadnan di Curaçao y Aruba cu semper mi ta topa na torneonan di baseball, mi a cera amistad cu Hulandesnan. Loke a pone cu mi conocemento di Hulanda a engrandese,’ asina Minister Besaril a bisa.
E programa a continua na unda Tanya Fraai a entrevista diferente studiante tocante nan estudio, e razon pa a scohe pa bin studia na Amsterdam y otro topiconan interesante. E studiante Arubiana Neftaly Albertsz, cu ta studiante pa docente biologia na Hogeschool van Amsterdam a tena un discurso den cual ela conta a base di su mesun experencia con e bida di studiante na Hulanda ta y por a duna a base di su experencia algun avisonan util pa e studiantenan nobo.
Na final e studiantenan a participa na un quiz pa mira con bon nan conocimento di Amsterdam ta, sigi pa un introduccion di diferente instancianan cu ta di importancia pa e studiantenan.
Nota pa redacion: E groepsfoto ta di fotografo Roos Trommelen y e otro potretnan ta cortesia di Cas di Aruba.
