Otro luna lo ta importante den e historia di Serlimar SG mirando cu Corte lo mester dicidi si ta extende e periodo di surseance van betaling. Esaki ta un decision cardinal y e decision di juez lo determina destino di e compania nacional aki.
Desde prome dia Minister di Naturalesa Ursell Arends a haci esfuerzonan grandi pa mustra na juez cu Serlimar tin derecho di existencia. Mientras cu ta preparando e plannan pa renoba e compania, e minister a bin ta traha riba tres paso concreto pa logra sanea e situacion actual na Serlimar.
Prome punto importante tabata pa yega na un areglo di pago cu Departamento di Impuesto. A logra haci esaki durante december 2021 cu bon cooperacion di e departamento menciona. Siguientemente e segundo paso ta pa cuminsa paga debenan atrasa cu comercio. Apesar di e situacion financiero fragil di Aruba, asina mes a logra yega na 2.5 miyon pa pone den presupuesto pa 2022. Aunke e fondo aki ta solamente un parti di e debe total, e montante aki ta critico pa Serlimar por cumpli cu su debenan den sector priva. Esaki ta pa paga servicionan cu Serlimar a ricibi den pasado for di comercio, pero pa cual e contribuicion di Gobierno e tempo ey no tabata suficiente.
Por ultimo e compania mester a ahusta su tarifa na uno comercialmente mas realistico y di parti di Minister Arends a aproba e ahustacion aki. Den pasado structuralmente a subi gasto y baha entrada di Serlimar. Esaki ta un formula cabez-abou di haci negoshi y ta un formula excelente solamente si e intencion ta pa kibra e compania. Cu e tarifa nobo Serlimar ta pone su entrada na un nivel corecto.
E tarifa nobo pa 1 container lo bira AFL 28.00 y pa 2 container AFL 38.00 entrante februari 1. Anteriormente esaki tabata AFL 25.00. Desde inicio a indica cu e sistema di cobransa riba su mes ta un factor cu a causa daño na e compania y cu esaki mester a wordo optimaliza. Serlimar awo a inverti den technologia nobo cu ta haci posibel pa cobransa sali na tempo y na un manera corecto y eficiente den cual nan por garantisa cu Serlimar ta ricibi e entrada y ta ser paga dor di e clientenan pa e servicio cu nan ta duna.
Segun Minister Arends, proximamente lo tin mas pasonan pa logra baha Serlimar su dependencia riba gobierno. Pero pa garantisa continuidad lo mester di un reforma interno pronto. Minister a duna di conoce tambe cu lo cambia e meta y tarea di Serlimar. E trabou principal di e compania ta recogemento di desperdicio. Esaki ta loke e compania ta haci hopi bon. Pero e parti di separacion y procesamento di desperdicio lo mester sosode na otro forma. Pa esaki tin un proyecto pa modernisa e manera con na Aruba nos ta procesa e diferente “waste streams”, o sea e diferente tipo di desperdicio cu nos ta produci. Den futuro sector priva lo tin un rol hopi importante den maneho di waste streams y den diseña e waste policy nacional. Nos ta revisando tur e leynan cu ta aplica riba e tereno aki.
Ta un lastima pa mira con e compania aki a wordo malusa pa probecho politico. A abusa di dje di tal forma cu casi ela bati bancarota. Y den esaki ta e trahadornan a keda mal sirbi y awe nan entrada ta den wega. Pero nos tin speransa cu huez lo reconoce e esfuerzo cu a wordo haci y cu e lo sa di duna Serlimar un oportunidad pa restructura y sigui dilanti. Tur hende lo compronde cu ningun compania ta traha por nada. Mi tin pleno confiansa cu Aruba henter ta compronde cu Serlimar tambe mester di ingreso pa e por sigui. Serlimar mester di Aruba mescos cu Aruba mester di Serlimar.