Tur hende na Aruba ta depende grandemente di conexion aereo. Avionnan ta baha na Aruba tur dia cu carga comercial, nan ta trece turista, of otro productonan cu ta haci bida posibel riba nos isla. Tur avion mester cumpli cu reglanan internacional. “Arrival” y “departure” ta bon conoci, pero menos conoci ta e trabou cu tin tras di cortina cu ta haci cada “departure” y “arrival” posibel. Tur esaki danki na e team di Directie Luchtvaart, ANSA y di Meteo.
Diaranson 9 di februari 2022 Minister encarga cu transporte, sr. Ursell Arends a reuni cu ehecutivonan maximo di ICAO (Organization Internacional di Aviacion Civil) pa confirma cu Aruba tin un compromiso pa duna nos teamnan tur loke nan mester pa sigui haci posibel “arrivals” y “departures”. Meta principal di e reunion aki di Ministro na Mexico tabata pa emfatisa en persona e compromiso di Gobierno di Aruba na cumpli cu regla y leynan internacional di aviacion. Minister Arends a reuni cu sr. Melvin Cintron, Regional Director di ICAO y sr. Julio Siu, deputy Regional Director di ICAO. Nos por conta ariba cu Minister Arends lo dedica tur recurso disponibel pa Aruba por cumpli cu reglanan di ICAO mirando cu aviacion ta critico pa nos economia y e calidad di bida cu nos tur ta goza di dje na Aruba.
Ehecutivonan maximo di ICAO a prepara pa Minister Arends un presentacion amplio riba diferente tema di aviacion mustrando cu lastimamente Aruba no ta un lider regional na e momento aki. Entre otro a mustra riba faltanan di Aruba su cumplimento cu e normanan di ICAO y espacio pa mehoracion den tur esakinan.
Ningun momento esaki ta debi na falta di nos profesionalnan. Falta di sosten y compromiso politico na asuntonan di aviacion a pone Aruba den un posicion fragil. Minister Arends y ICAO a elabora riba paketenan di asistencia tecnico cu ICAO ta ofrece pa nos cambia e situacion inacceptable aki y tambe e programa di ICAO cu yama “No Country Left Behind”. E programa aki ta un proceso cu ta duna paisnan miembro, manera Aruba, e oportunidad pa hunto cu ICAO, ta implementa procesonan pa mehora cumplimiento cu e normanan di ICAO. Aruba mester tuma pasonan pa cumpli cu standardnan mas halto di ICAO. Banda di e puntonan unda Aruba tin trabow pa hasi ICAO reconoce cu tin puntonan unda Aruba ta sobresali danki na esfuerzo nos profesionalnan.
Minister Arends y Sr. Cintron a firma un intencion di compromiso pa cu e plan di accion cu lo wordo implementa bou di e programma “No Country Left Behind”. “Aruba mester bira lider den Caribe”, Minister Arends a enfatisa na tur alto ehecutivo di ICAO cu e gabinete actual si ta reconoce importancia di aviacion pa Aruba y e ta reconoce e balor indispensable di trabou ehemplar desplega pa nos Arubianonan den Departamento di Aviacion Civil (Directie Luchtvaart), kendenan na e ocasion aki a wordo representa pa Sr. Edwin Kelly y Sr. Anthony Kirchner. Ambos yiunan di terra cu ta goza di gran reputacion den mundo internacional di aviacion pa nan capacidad y nivel profesional.
Durante e ceremonia Ministro a mustra cu Srs. Kelly y Kirchner tambe ta conta cu aporte di un grupo di mas Arubianonan experto, cu apesar di tanto reto a sa di sigura aviacion civil na Aruba ta stabil. No por perde di bista tur e hendenan aki cu ta traha den tur anonimadad pa sigura un bon nivel di bida pa nos tur na Aruba.
Ministro Arends ta satisfecho cu e bishita y ta sinti cu serca ICAO no por tin duda cu nos Arubianonan ta bai mustra mundo henter kico nos hendenan por. Nos lo usa loke nos tin pa modernisa y fortifica nos sistema di aviacion, y nos leynan lo cumpli cu standard internacional di aviacion, y e compromiso pa cumpli cu normanan di ICAO. Na final dia un aeropuerto moderno sin avion ta un simpel shopping mall. Aviacion ta critico pa nos turismo y economia. Ministro Arends ta manda palabra di gradicimento pa tur personal di Directie Luchtvaart, Directie Buitenlandse Betrekkingen y ta agradecido pa tur e sosten ricibi di Embahada di Reino Hulandes na Mexico.