Ta for di momento cu partidonan politico a yega na un acuerdo pa forma e coalicion aki, esta e programa Hunto pa Aruba, a inclui tambe un miho cuido pa cachonan riba caya. Den e ultimo añanan a haci avancenan importante, manera ta creacion di e shelter na Wayaca specialmente pa atende e problematica aki na luna di juli di aña 2020. E tempo ey a inaugura e centro di cacho, cu entretato ta dunando masha bon resultado. Pero awo gobierno, por medio di Minister Andin Bikker a dal un paso mas leu, cu inauguracion di un vehiculo special di control riba cachonan riba caya.
Minister Andin Bikker a splica cu e vehiculo ta procedente di Cuerpo Especial Arubano (CEA) y lo pasa bou maneho di Bureau City Inspector. Nan trabou lo ta pa, por medio di nan empleadonan cu tin e autoridad di Buitengewoon agent van politie, pa eherce control riba caya. Na momento cu topa cu cachonan los, lo hinca nan den e van, purba yega na nan doño, sino ta hiba e animal pa e centro di cacho na Wayaca. Ey lo anuncia riba rednan social cu nan tin e cacho y si den tanto dia e doño no aparece, lo pone e bestia disponibel pa adopcion. Di e forma ey ta soluciona dos problema pareu, esun di molester di cachonan riba caya y e otro pa busca un doño nobo cu si ta stima bestia.
Manera ta conoci, Aruba a pasa un “hondenverordering” di algun tempo caba. Den e ley aki ta maneha tur e reglanan cu doñonan di cacho mester mantene nan mes na dje, pa por cria nan bestia den forma sano y corecto. Por ehempel, laga bo cachonan los riba caya, no ta permiti mas. Y den esaki tin consecuencia pa e doño di cacho, entre otro multa, of por kita e bestia mes for di dje, pa busca un doño nobo.
Minister Andin Bikker a felicita tur esunnan cu a traha duro pa e logro aki, pasobra cu e vehiculo awo por haci mas trabou rond di e leynan pa proteccion di cachonan. El a desea Cuerpo Policial Aruba y Bureau City Inspector hopi exito den ehecucion di nan trabounan pisa cu lo sigui awo.
