Ta despues di hopi aña cu e team di intervencion special conoci como IBT BOT-K9 di Instituto Correccional di Aruba, cual ta consisti di miembronan di KIA y CEA, ta haya uniform y ekiponan nobo atrobe. Desde aña pasa Minister Andin Bikker tabata atendiendo cu e proyecto aki, pero e pandemia a presenta sin spera. Na januari 2021 a pone mas velocidad den e proyecto, ya cu e empleadonan di e team aki di KIA y CEA tabatin hopi aña sin por a haya uniform y ekiponan nobo.
Ademas a percura pa bestel uniform nobo pa full e personal di KIA cu tambe tin hopi aña sin haya uniform nobo. Pero comosifuera poco, ora cu tur cos tabata na caminda pa Aruba, ata ta bin otro retraso atrobe, ora cu e barco a pega den e Suez Canal. Cu retraso mes parti di e carga a logra yega nos isla, pendiente mas cargamento cu ta na caminda dentro di algun siman mas.
Locual a yega Aruba awo ta e uniformnan special pa e unidadnan specialisa den prizon conoci como unidad di IBT y BOT-K9. E uniformnan regular pa personal di KIA lo yega den algun siman mas. Pa e momento ey, henter e personal lo por conta cu un uniform nobo, di calidad superior, capas pa por traha den dje tur dia, durante oranan largo y sin lubida e influencia di salpeter cu tin eybanda.
Unidad IBT y BOT-K9
Director di KIA, Gino Winklaar, a informa cu dos grupo na KIA a haya uniform nobo, esta e Interne Bijstandsteam (IBT) y e Bijzondere Ondersteuningsteam (BOT K-9 unit). E uniformnan ta parce esun di Riot, pero tin un diferencia, cu ta e sapato. IBT tin e uniform un tiki mas special, mientras BOT K-9 tin helmnan specialisa.
Un grupo di 30 empleado a haya uniform nobo for di man di minister Andin Bikker. E grupo di BOT K-9 a haya nan jacket bulletproof, aunke cu nan tambe por yuda na momento cu tin Riot, o sea un lantamento, den prizon. Awor nan ta completo mirando cu nan a haya tur material necesario. Adicional a haya handschoen y mea special.
Un logro mas di Minister Andin Bikker pa Husticia di Aruba.
Aunke e por mustra di ta un asunto masha normal, ta bon pa enfatisa cu desde e pandemia a yega Aruba na maart 2020, nada ta normal mas. Gobierno a hay’e ta maneha un pais cu menos entrada, pero cu gastonan igual. Diariamente ta repasa e prioridadnan den cuadro di e fondonan limita y a sigui inverti den husticia y orden publico. No obstante e retonan financiero y di e pandemia e mandatario a esforsa y a logra pa provee hopi material di trabow y vehiculonan pa personal di entre otro Cuerpo Policial, Guarda nos Costa, Inmigracion Aruba, Cuerpo di Bombero, Centro Orthopedagogico, Landsrecherche, KIA, CEA, NCTVI y recientemente tambe pa e unit nobo di Bureau City Inspector. Hecho ta cu e Gobierno anterior no a duna prioridad y a laga e departamentonan di Husticia den 8 aña di gobernacion hopi desola y bandona, pues ainda tin trabou nos dilanti pa completa.
KIA
Korrectie Instituut Aruba, KIA, a muda pa su localidad na Santo di Patia na San Nicolas dia 22 di september 1990, pues casi 30 aña pasa. E prizon tin un populacion di un maximo di 300 detenido, parti den detencion preventivo, seccion di hende muhe y seccion di hubentud. Na KIA tin un gran cantidad di empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.
