For di e ala mas hóben di PNP (Partido Nashonal di Pueblo), Hubentut Nashonal, su Presidente, Miembro di Parlamento Gwendell Mercelina Jr., kier ekspresá e gran atmirashon pa e paso históriko ku nos lider di partido Ruthmilda ‘Mimi’ Larmonie-Cecilia ta tuma awe (promé di novèmber 2024). Su huramentashon komo Miembro di Parlamento i lider di frakshon no ta solamente un momentu importante pa PNP, pero pa henter Kòrsou su ròl di demokrasia parlamentario.
Den kombersashonnan di Hubentut Nashonal, ta mira ku lider di partido Mimi ta representá, un ehèmpel, e forsa i determinashon di e hende muhé Kurasoleño. Su disposishon pa drenta i sigui sirbi den Parlamento despues di a fungi i traha duru den gobièrnu komo Vise-Promé Minister i Minister di SOAW ta demostrá un kompromiso sin presedente ku e pueblo. E ta un inspirashon pa nos tur, i spesialmente pa e generashon hóben ku e la duna sostén pa e forma di hiba direkshon ku politika korekto basá riba balornan den nos pais.
E paso aki ta subrayá e balornan fundamental di PNP: sirbishi, profeshonalismo i perseveransia. Liderazgo di Larmonie-Cecilia ta duna nos konfiansa den futuro. Ku PNP lo sigui traha pa un Kòrsou kaminda bon gobernashon ta importante, kaminda transparensia ta esensial i tur hende tin oportunidat igual pa hustisia prevalesé.
Hubentut Nashonal tambe kier ekspresá imenso gratitut na Elvin Gerard pa su dedikashon i kompromiso ku nos pueblo i partido. Su desishon pa pone su asiento disponibel na lider di partido ta muestra di berdadero grandesa. Meskos ku Osepa i Mercelina, ku anteriormente a pone nan asiento disponibel na momentu ku e susesonan ku a surgi ora a saka PNP for di gobièrnu, Gerard su akshon pa futuro ta grandi. E ròl di e bos di Gerard ta keda un forsa balioso den PNP i nos ta dese’é tur klase di éksito den su ròl nobo.
PNP ta un partido demokratiko i ku e mihó refleho di nos pueblo. Ku líder di partido Mimi Larmonie-Cecilia komo Miembro di Parlamento i lider di frakshon PNP, nos lo sigui traha ku energia renobá pa un Kòrsou ku ta move den bon so.
