Deporte a keda hopi afecta den aña 2021 cu COVID. Sinembargo esaki no ta na Aruba so pero rond mundo deporte a keda afecta. Nos a combersa cu e conocedo Campeon mundial Gregory Milliard cu tin su academia di boxeo/ MMA na Aruba ta duna di conoce cu aña 2021 tabata un aña duro. Sinembargo prome cu deporte e salud di tur deportista ta na prome luga, pa tur tin salud mirando cu Aruba a topa un temporada hopi dificil cu COVID y tin deportistanan cu a bira malo.
Sinembargo di otro banda ta contento mirando cu Aruba a bin ta compronde cu e yabi pa combati e virus di COVID ta pa biba mas saludabel, Segun Milliard mas saludabel bo ta e ta yudabo pa bo combati e virus aki. Milliard Academy tabatin lunanan tof , pero di otro banda a trece cambionan den deporte unda cu si tabata focus riba un tipo di deporte so, cu COVID mester a amplia diferente otro tipo di deporte pa por duna e cliente e manera cu e por keda haci deporte pa mantene su mes saludabel.
Sigur esakinan ta retonan cu e academia di Milliard a pasa den dje. Tambe por bisa cu den december normalmente ta un luna hopi keto, pero e aña aki tog a mira basta hende activo den un luna cu normalmente ta keto. Tur esaki ta desaroyonan cu e COVID a bin cu ne.
Loke cu tabata hopi importante den e proceso aki ta cu Milliard Academy a keda hopi motiva, aunke na principio tabatin hopi miedo debi cu no tabata sigur kico e virus ta, pero segun e tempo ta pasa sa con pa controla e situacion.
Segun Gregory Milliard e ta kere cu gobernantenan encarga a sa di maneha e situacion bon pa cu Aruba ta na e momentonan aki cu un flexibilidad cu na algun pais ainda nan no tin. Loke cu ta un realidad ta cu den e temporada aki hopi hende tin hopi stress, hopi problema personal, problema cu placa, problema cu no tin trabao y e stress con ta bay haya un entrada pa paga e debinan cu tin. Tur esaki ta hunga un rol den e serhumano durante di COVID y cu ta haya personanan cu ta bin train pa por haci nan mente liber un rato. Segun Milliard e unico manera cu nos por atende cu tur e situacion aki ta pa nos uni, Aruba UNI.
Na Milliard Academy a trata tur punto na momento cu e persona yega y ta keda motiva nan den nan situacion, segun Milliard e ta conoci di ta un lider y e lo keda motiva sin cansa pa mira e persona stabiel y trankil principalmente den e temporadanan aki.
Pa 2022 Milliard Academy ta cla y a forma su team unda cu lo diversifica e deportenan cu tin , no lo focus riba uno so , pero varios tipo di deporte teniendo cuenta riba e necesidad di e cliente. Tambe den 2022 lo cuminsa start cu un proyecto pa muchanan di basisschool cu huiswerkbegelijding den dje. Proyecto movecion pa nos grandinan pa asina motiva nos grandinan pa nan por move mas cual ta hopi importante.
Tambe Milliard Academy lo habri un otro facilidad na My Fitness pa brinda mas oportunidad y sigui motiva muchanan pa haci deporte. Lo cuminsa bay scolnan back y duna presentacion pa motiva e muchanan, ultimo a haci dos presentacion y por a mira cuanto mucha ta haci un deporte, esaki ta di preocupa.
Tambe loke cu a constata, ta cu paga pa un deporte ta hunga un rol na e momentonan aki y esaki ta afecta e muchanan. Gregory Milliard tin un deseo pa sinta cu minister di deporte y minister di enseñansa pa deporte ta un punto importante na scolnan.
Milliard Academy ta trata di motiva e muchanan, pero e adultonan no mester keda atras. Boxeo den su totalidad ta gusta bao di e hobenan y esey lo keda enfoca riba dje, lo sigui motiva hobennan pa sigui su pasonan mirando cu e deporte riba su mes ta uno interesante y respeta den exterior.
Sinembargo aki na Aruba placa ta hunga un roll na momento un hoben kier sigui desaroya internacionalmente. Den henter e proceso aki ta cu na momento cu un mucha ta cla e deseo ta biba pa por box cu un contrincante, esaki ta loke cu no tin na Aruba y mester bay den exterior, asina e mucha ta sigui challange su mes pa crece den e deporte, segun Milliard.
Pa 2022 Aruba mester ta prepara paso Milliard Academy lo bin cu diferente proyectonan y ta cla pa sigui duna sosten na nos muchanan, hobennan , pero tambe adultonan. Gregory ta lamenta cu te ainda deporte na Aruba no ta considera como un necesidad y e no ta haya su prioridad. Sinembargo ta kere firmemente cu no por para keto, mester sigui padilanti paso esey ta e unico manera cu por yega na un solucion pa Aruba y e situacion di COVID drecha, ta trahando man de man. Trahando duro y hunto mane un famia nos lo logra haya e Aruba back cu nos conoce.
