Bon kargá i empaketá Djárason 3 di Mei 2023 e destakamentu di ayudo den emergensia di Defensa den Region Karibe Hulandes ta sali pa Islanan Ariba. E Eskuadron di Marinir desde Aruba, Militarnan di Region Karibe, e 43 Compagnie in de West i e barku di apoyo Zr.Ms.Pelikaan desde Kòrsou. E Militarnan ayanan lo bai ehekutá e ehersisio anual di yudansa den emergensia i promé ousilio durante orkan (HUREX). Spesial ta ku e aña aki tambe Minister di Defensa di Hulanda, Kajsa Ollongren, lo hasi un bishita na e ehersisio na Sint Maarten.
For di mañan, djarason 3 di Mei, mas o ménos 500 Militar ta prepará nan mes den Region Karibe, pa ayudo di promé ousilio despues ku un orkan pasa. E estrago ku orkan Irma a okashoná na 2017, ta grabá serka hopi den nan memoria. Ta importante pa brinda bon yudansa mas pronto ku ta posibel. Ta p’esei Defensa ta trein un biaha pa aña, antisipando e temporada di orkan, tokante kiko nan mester i por hasi e momentu ei. E ehersisio ta sosedé rondó di e islanan, Sint Maarten, Saba i Sint Eustatius. Riba programa tin entre otro e strukturanan di e Komishon di Krísis i mantenshon di órden i seguridat públiko. Pero tambe hasimentu di zonanan afektá aksesibel, evakuashon di habitantenan i entrega direkto di yudansa di emergensia i promé ousilio. E ehersisio ta dura te ku i inkluso Djaluna 8 di Mei.
Minister di Defensa
E aña aki Minister di Defensa di Hulanda Kajsa Ollongren, tambe ta uni su mes na e ehersisio di yudansa di emergensia durante orkan. Durante su bishita na Sint Maarten entre otro pa medio di demonstrashonnan lo e mira di ki forma Defensa ta kolaborá durante un desaster natural ku outoridatnan lokal.
