Lider di partido y di fraccion di AVP, Mr Mike Eman, ayera mainta a mustra durante conferencia di prensa, cu e noticia a yega cerca trahadonan di hospital y tambe probablemente cerca esunnan di Insam, cu e Landenpakket ta den pleno ehecucion.
Eman a sigui mustra cu como parti di e Landepakket aki, recortenan, austeridad y medidanan ta forma parti esencial di e forma di mira e futuro di Aruba manera articula y poni tambe den e Landenpakker cu a keda firma pa y despues un biaha mas ractifica recientemnete pa Evelyn Wever Croes.
E lider di fraccion a mustra tambe cu den debatenan cu a tuma luga prome cu eleccion, cu AVP tabata e unico partido cu a mustra cu e Landenpakker tin enfasis demasiado grandi riba recorte, riba austeridad, riba medida y mas impuesto y mucho poco atencion riba recuperacion economico di Aruba.
Si e recuperacion economico aki no tuma luga, entradanan di gobierno ta keda minimal caminda gobierno lo keda den e ciclo vicioso aki di busca caba bes un forma pa corta den enseñansa, corta den salubridad publico, corta den asistencia social, corta den salario di personal y tambe busca mas entrada cu impuestonan.
“Cu dolor den nos curason y apenas algun dia despues di eleccion, caminda nos a enfatisa riba e peliger aki di e caminda di un Landenpakket cu enfasis asina grandi riba cortamento, riba austeridad, riba impuesto, cual ta trece nos mas y mas den un recesion, awe nos a haya dos informacion.
Uno di un rapport c’un cantidad di medidanan proponi den ciudo medido, cu ta afecta directamente y severamente nos pashentnan, afecta nos comunidad tambe, nos ta mustra cu gran preocupacion cu gerencia di hospital a wordo notifica den cuadro di e Landenpakket, cu mester bin cu austeridad mas ainda, cu mester bin cu reduccion substancial di salario di empleadonan.
Aki ta trata di trahadonan di hospital cu a pasa un aña y mey hopi pisa, caminda nos colega Selene Kock, specialista di pulmon a biba di cerca y experencia di cerca e presion y tragedia grandi cu Covid a pone riba nos cuido medico y awor hustamente esunnan cu a carga Aruba door di e periodo aki, trahando 24/7, bandonando famia y coriendo riesgo pa nan propio salud, awe ta wordo puntra pa corta 10% den nan salario.
Nos ta sumamente preocupa pero tambe desapunta cu e direccion aki ya cu den hopi pais rond mundo, mas tanto Europa, esunnan cu a traha den cuido medico, a haya un aumento y reconocimento pa e sacrificio cu nan a haci, sea den salario of otro formanan di compensacion pa tur a trabou cu nan ta haci.
Sinembargo na Aruba e prioridad a bira pa corta den salario di esunnan cu ta traha den cuido medico y na diferente ocasion nos a mustra cu na momento c’un pais tin retonan grandi su dilanti, e trabou primordial di gobierno mester ta pa trece tur stakeholdernan, tur partner na mesa, dileña kico ta e reto, papia di e solucionnan, papia di e alternativanan cu por encamina pa miho nos pais por sali for di retonan e pais ta enfrenta,” lider di AVP, Mike Eman a declara.
