CBS ta mustra
Cu cifranan cu Centraal Bureau Statistiek a presenta recientemente, ayera mainta lider di fraccion di AVP, Mike Eman a mustra con tanto pensionadonan como esunnan di entrada abou, a bay atras den informa espantoso.
“E pais aki a crea un AOV y cada momento cu a midi AOV na con e ta cumpli cu necesidad basico pa hendenan por percura pa nan tin pan riba mesa, cu nan por paga pa nan cas, cu nan por paga pa nan necesidadnan, e fondo di pensioen tabata tey pa percura cu e AOV aki ta mas alcansabel posibel.
Sinembargo awe cifranan cu nos tin di CBS ta indica cu tin 22 mil pensionado y ora cu mira kico un pensionado tin na entrada y mira ta e ‘estaansminimum,’ cada pensionado desde 2022 ta cay 700 florin atras tur luna pa nan por paga pa nan necesidadnan.
Esaki ta cosnan cu a inicia desde 2017 cu a bin dor di redoblacion di BBO, inicialmente di 3 pa 6 riba tres schakel cu ta igual na un aumento di 18%, riba costo di bida di nos ciudadanonan pa despues a bira subi esaki cu 1% cu ta bira finalmente un aumento di 3% y awor gobierno ta bay pone un 7% mas na frontera.
CBS ta mustra cu for di 2017 c’un persona cu salario minimo of un pensionado por tabatin un deficit di 200 te cu 300 florin, tumando e ‘Reparatietoeslag’ , esaki lo a bira un deficit di 150 florin pero awe na 2022, e deficit aki pa un empleado cu salario minimo, ta di 713 florin y pa un pensionado e deficit aki ta di 800 pa 1000 florin y esaki ora cu ta trata di un persona cu ta bibando su so.
Si ta dos persona bibando hunto, esaki lo ta mucho mas y esaki ta e realidad cu Aruba ta bibando y pa tal motibo desde Augustus di 2022, fraccion di AVP a solicita un reunion publico di Parlamento pa por discuti riba e tema serio aki.
Durante tratamento di presupuesto 2023, fraccion di AVP a entrega un presupuesto alternativa pidiendo un aumento di e ‘Reparatietoeslag’ pa por cubri e deficitnan aki, nos a pidi un aumento di bijstaand, pa esunnan cu tin esaki, por cubri e deficitnan menciona.
Nos a kita placa for di ‘goederen en diensten’ pa asina no mester a kita remedi for di nos grandinan, sinembargo escogencia di gobierno tabata pa cana e caminda aki, caminda paso a paso, ta fracturando e ‘vangnet sociaal’ cu nos a crea pa nos hendenan.
Un entrada cu ta cubri suficiente pa entradanan basico, ya cu salario minimo ta leu di por cubri, un pensioen cu ta cubri e gastonan basico, cu ya mas e pensioen no por cubri leu di e gastonan basico di un famia.
Di tur banda esunnan cu tin cu cumpli cu nan necesidadnan,tur dia ta sinti cu no unicamente e cuminda, no unicamente e paña, no unicamente e transportacion, pero ora cu e mucha tin cu bay scol, tambe eynan e ‘schoolgeld’ ta wordo aumenta.
Ora cu nan tin cu bay busca nan remedi, tambe eynan tin cu pone placa y consecuencia di esaki ta cu ora cu tuma e cifranan di Centraal Bureau Statistieken y esakinan no ta cifranan di AVP of Mike Eman pero di CBS cu ta mustra bon cla cu tuma e 25 mil persona cu ta 56.6% di esunnan cu tin un ‘dienstverband,’ ta gana 2500 florin of menos.
Tur e personanan aki ta core den e deficitnan aki di 700 florin pa luna cu CBS a registra loke ta nifica cu den nos mundo di empleadonan, 25 mil ta bibando bou di e ‘bestaandsminimum,’ den e pais aki, cual ta algo hopi serio pero cu gobierno no kier atende y no kier yuda pueblo,” Mike Eman lider di partido AVP a mustra ayera mainta den Parlamento.
