Recientemente fraccion ACCION21 a presenta un iniciativa di ley nobo cu e meta pa practicamente
modernisa nos leynan electoral y duna Arubano bibando den exterior e derecho di voto. Esaki ta un
cambio grandi pasobra Arubano den exterior no tin derecho di voto. Esaki ta un iniciativa di ley entrega
na Raad van Advies cu e fraccion a traha detayadamente riba dje cu varios punto y cambio importante cu
lo haci e proceso uno hopi mas democratico di locual e ta actualmente.
E cambio grandi cu e iniciativa di ley aki ta trece cu ne sigur ta e parti di brinda Arubano den exterior
derecho di voto. E di dos punto cardinal den e ley aki ta trata cu candidatonan cu tin mas voto riba un
lista ta procede pa parlamento, no segun numeracion manera cu e ta actualmente. E di tres cambio den
e legislacion ta toca e sistema di restzetels. Si un partido yega 75% di kiesdeler e ta bin na remarke pa
un posibel restzetel. Despues cu tur otro partido cu a logra un asiento haya un restzetel, partidonan cu a
yega 50% di kiesdeler tambe ta bin na remarke pa un posibel restzetel. “E ta haci’e mas democratico,”
lider di fraccion ACCION21, Miguel Mansur ta expresa.
E di cuater punto of cambio ta introduccion di eleccion primario, mescos cu tin na Corsou. Nos ta den un
situacion caminda cu partidonan ta abusa di nos leynan electoral, e partido grandinan ta manda nan
sostenedonan firma pa partido chikito cu den eleccion ta saca menos voto cu cantidad di firma. Cu e
cambio nobo aki, durante dos dia tin un eleccion primario unda lo vota pa wak cua partidonan realmente
tin sosten pa bay eleccion of no. Finalmente, e di cinco cambio ta introduccion di un limite di termino:
diesdos aña maximo bo por sinta como parlamentario, ocho maximo bo por sinta como minister, y ocho
aña maximo como prome minister. Si bo haci tur tres, cumisando na parlamentario, despues como
minister y prome minister, bo por pasa un total di 28 aña den politica pero no mas cu esey.
Finalmente, ACCION21 ta subraya cu kier separa eleccion pa parlamentario y minister, pero esey ta bay
mas leu cu e cambio di ley aki. “Esey nos kier haci den un simposio nacional pa discuti esey cu pueblo,”
segun Mansur.
STIMULANDO ENVOLVIMENTO CONTINUO
E cambio di ley aki lo no solamente simplifica e proceso, pero tambe lo curasha envolvimento continuo di
Arubanonan den exterior den nos proceso electoral. E reforma aki tin e meta pa crea un experiencia di
votacion pa nos yiunan di tera den exterior cu ta stabil y eficiente tambe, fortaleciendo e conexion entre
diaspora Arubano y nan hogar.
CADA VOTO TA CONTA
E reformanan aki tin e meta pa aumenta transparencia, igualdad, y mas cu tur cos confiansa di e votado
pa loke ta Aruba su sistema electoral, sigurando cu cada voto ta conta. E legislacion aki ta un paso
significante na bienestar di un proceso democratico mas inclusivo pa Arubanonan den exterior y na cas.
E reformanan lo sigura cu pueblo su voto lo ser traduci den e forma mas claro, puro y sin distorcion ora ta
toca representacion den parlamento, tanto entre lista di un partido pero tambe na nivel nacional entre
partidonan.
Votacion ta un derecho fundamental, y gobierno di Aruba mester ta comprometi pa sigura cu tur
ciudadano cu por vota, sin importa nan localidad, pa tambe tin un bos den eleccionnan nacional. E
cambio di ley aki lo haci’e facil pa Arubanonan afo eherce nan derecho di voto y keda envolvi den
desaroyo di e futuro di nan isla.
