Den cuadro cu e situacion di nos mercado laboral, e problematica di un poblacion indocumenta
significativo ta keda un reto pa nos pais. Tin hopi cos pa haci, y tempo ta sigui cana sin warda
riba ningun hende, pues mester cuminsa tuma accion. Parlamentario Miguel Mansur
(ACCION21) a entrega un total di bintitres (23) pregunta dirigi na minister di Labor, Energia y
Integracion, Glenbert Croes, cual ta preguntanan al caso cu pueblo merece di haya contesta
riba nan debidamente.
Cumisando cu e parti di data, algo hopi esencial pa por berdaderamente midi e parti di cuanto
hende indocumenta nos tin na Aruba, Mansur ta puntra gobierno si por comparti cu parlamento
tur estudio haci cu nan tin, of estudio cu otro organisacion a traha, cu ta estima tamaño di
poblacion indocumenta. Mansur ta pidi minister Croes tambe si por comparti cu parlamento
cuanto persona a keda legalisa atraves di e ‘alternative legal pathway’ of ‘alternativa legal’
desde cu a introduci esaki. ACCION21 tambe kier sa e capacidad actual di DIMAS pa
regularisa personanan atraves di ‘alternative legal pathway’ sea anualmente of mensualmente.
Locual ta bon pa sa tambe si minister Croes ta satisfecho cu e resultadonan di e alternativa
legal ariba menciona.
SITUACION DI ‘OVERSTAY’
Un fenomeno conoci tambe den henter e asunto di personanan indocumenta riba nos isla, ta e
asina yama ‘overstay’ caminda cu personanan ta yega nos pais legalmente pero ta keda
ilegalmente. ACCION21 kier sa kico ta e cifra anual desde 2018 te cu 2023 di personanan cu a
drenta legalmente pero te cu fecha di awe no tin permiso pa permanece (overstayers). Ta pidi
minister Croes pa comparti cu parlamento e pais di origen di esnan cu a ‘overstay’ pa aña
desde 2018, y tambe ki sancion un persona cu a keda despues di su estadia permiti ta sufri.
APPLICACION DI SANCION
Parlamentario Mansur ta puntra minister Croes si por comparti cu parlamento si e sancionnan
ta aplica, anto si e contesta ta afirmativo, cuanto persona cu a ‘overstay’ ta deporta anualmente,
incluyendo pais di origen. Algo cu no tin claridad riba dje tampoco ta e periodo di exclusion
actual pa un persona cu a ‘overstay’, y cuanto persona ta exclui di re-entrada a base di
‘overstay’ y pa cuanto tempo nan exclusion ta valido. Tur esakinan ta preguntanan cu minister
Croes tin pa contesta.
ASILO
Ta haci falta di informacion riba cuanto persona cu a keda exclui di re-entrada a haya un
permiso di estadia, y ki tipo desde 2018. Un otro pregunta ta cuanto permiso a keda nenga pa
motibo cu a ‘overstay’ anualmente, cumisando cu 2018. Tambe ta interesante pa sa cuanto
aplicacion pa asilo tin pendiente actualmente, y ki porcentahe di aplicacion pa asilo ta keda
aproba. Si un aplicacion pa asilo keda nenga, tambe ta importante pa sa si e persona por aplica
pa otro tipo di permiso, of mester bandona Aruba. Na otro banda, si un persona su aplicacion
pa asilo ta pendiente, e por aplica pa un otro tipo di permiso?
REUNIFICACION FAMILIAR
E tema aki sigur ta uno hopi compleho, tin diferente aspecto cu bo no por laga afo y un di
esakinan ta trata reunificacion familiar. Con esaki ta afecta bienestar di esnan indocumenta y
nan famianan. Mansur ta puntra si gobierno por comparti cu parlamento kico e maneho actual
ta riba reunificacion familiar tambe, cumisando riba e maneho di esaki. Lo ta interesante pa sa
si tin un plan pa cambia reunificacion familiar mirando cu Aruba ta sobre-popula. Ta pidi
minister Croes si por comparti cu parlamento si tin algun programa di integracion pa
migrantenan nobo, y si e contesta ta afirmativo, di kico esaki ta consisti, y ken ta responsabel
pa su administracion.
Finalmente, ta pidi minister Croes si por comparti cu parlamento e cantidad di migrante
temporal, esnan sin firma liber, cumisando cu 2018. Lo ta bon pa sa si minister Croes ta
satisfecho cu e maneho actual di inmigracion, y si por comparti cu parlamento di Aruba pa kico
si of no.
