Nos lucha victorioso pa Status Aparte a culmina den un Constitucion di Aruba cu ta e fundeshi di nos pais, e nacion Arubano. Diabierna ultimo a sosode algo lamentabel dilanti bestuurskantoor caminda un grupo di lidernan di sectanan Cristian a purba ocasiona un atentado contra nos Democracia. E tres pilarnan di cualkier democracia moderno ta:
Trias politico: separacion di podernan ehecutivo (Gobierno), legislativo (Parlamento) y hudicial (Corte)
Estado di derecho
Separacion di misa y estado
Articulo 1 di nos Constitucion cu ta regarda derechonan fundamental ta prohibi discriminacion pa motibo di religion, ideologia, afiliacion politico, rasa, sexo, color, lenguahe, origen nacional o social, pertenencia na un minoria nacional, poder economico, nacemento of pa cualkier otro motibo. Netamente e mesun articulo cu ta salvaguardia libertad di creencia ta garantisa minorianan sexual pa wordo trata igual den casonan igual incluyendo matrimonio civil. Specificamente Articulo 1 di nos Constitucion ta e base riba cual HOF a dicta na fabor di Fundacion Orguyo habriendo matrimonio pa parehanan di mesun sexo.
Diabierna ultimo di forma oportunista tres lider di sectanan Cristian a congrega pafor di bestuurskantoor pa fomenta odio y division den nos pueblo. Nan a purba usa comportacion di mal gusto pa algun bishitante pa marginalisa mas ainda un comunidad vulnerabel y impone nan balornan religioso riba henter nos pueblo sin respet ninguno pa nos Constitucion, estado di derecho y separacion di misa y estado.
E actonan condenabel a bay asina leu cu un di e lidernan di secta Cristian den conferencia di prensa a MENASA miembronan di Parlamento. Ta completamente inaceptabel cu un lider di cualkier fe ta menasa representantenan eligi di pueblo y asina purba subordina nos democracia na fabor di nan tirania teologico. Purba destrui dos di e pilarnan di nos democracia y hiba nos pais bek den tempo pa middeleeuwen no por wordo permiti.
Nos a spera liderazgo di parti nos gobierno pero desafortunadamente esey no ta loke nos a mira. E mesun actornan cu a organisa e atentado contra nos democracia y menasa nos representantenan eligi a ser ricibi pa Prome Minister sin mas. Esnan huramenta pa defende nos Constitucion, nos estado di derecho, separacion di misa y estado a sucumbi na e forsanan di odio y division cu kier viola balornan Arubano di biba y laga biba.
Lidernan di secta stranhero cu kier bin fomenta odio y division den nos pueblo y destrui e fundeshi constitucional di nos pais mester wordo declara persona non-grata, nan permiso revoca y deporta bek pa nan pais sin mas. Nos leynan cu ta prohibi discriminacion mester wordo aplica pa salvaguardia e harmonia di nos pueblo y nos paz. Organisacionnan religioso cu kier mete den politica mester cuminsa paga belasting. Gruponan religioso cu kier eherece poder politico tin tur derecho pa forma un partido gana eleccion y despues habri nan boca. E pagado di belasting Arubano cu ta contribui mas cu un miyon florin pa aña na subsidio pa e misanan mester haya e escogencia si su placa ta bay pa misanan of no.
Nos partido lo sigui defende Constitucion di pais Aruba pa salvaguardia bienestar di nos pueblo y e nacion Arubano. Nos representante eligi lo sigui duna balor real y nunca desvia di su huramentacion:
“…dat ik de Staatsregeling van Aruba steeds zal helpen onderhouden en het welzijn van Aruba naar mijn vermogen zal voorstaan. Zo waarlijk helpe mij God Almachtig.”