Kolegio Ehekutivo di Boneiru ta balorá konservashon i protekshon di
naturalesa na nos isla masha. E Dekreto di Establesimentu i Aktividat BES (IAB BES) ku a
drenta na vigor dia 1 di aprel 2024 ta un instrumento importante pa duna direkshon na
esaki. E legislashon akí ta stipulá regla di medio ambiente pa empresanan na Hulanda
Karibense, kaminda ta indiká empresa komo ‘establesimentu’. E meta prinsipal di e
legislashon nobo akí ta mihó protekshon di nos naturalesa i medio ambiente.
Kontrato di kuido
E Dekreto di Establesimentu i Aktividat BES (IAB BES) ta imponé un obligashon di kuido
riba kada empresa pa anda den un forma responsabel ku materia residual, awa shushi i
medio ambiente, entre otro zonido òf vibrashon. E empresanan no tin mag di okashoná
daño na medio ambiente i nan tin ku evitá òf limitá esaki mas tantu posibel. E Areglo di
Establesimentu i Aktividat (RIA) ta kontené instrukshon general, di manera ku mayoria
empresa no tin mester di hasi petishon pa un pèrmit apart.
Kambionan importante pa empresa
E dekreto ta klasifiká e empresanan den kuater diferente tipo, yamá ‘establesimentu’. E
repartishon akí ta determiná kua ta e reglanan ku ta aplikabel.
Kiko ta bai kambia:
Tipo 1: empresa ku regla general, sin obligashon di notifikashon
Tipo 2: empresa ku regla general, ku obligashon di notifikashon
Tipo 3 i 4: empresa ku tin mester di un pèrmit di medio ambiente.
Bou di kua tipo di establesimentu bo empresa ta kai, ta dependé di e aktividatnan ku bo
empresa ta ehekutá i e influensia di e aktividatnan akí riba medio ambiente.
Empresa di tipo 1 i 2 ta empresa ku un influensia leve òf limitá riba medio ambiente, por
ehempel un ofisina, un restorant òf un garashi pa drecha outo.
Empresa di tipo 3 i 4 ta ehekutá aktividat ku ta kompleho òf ku por okashoná peliger pa
medio ambiente. Por ehèmpel un depósito di kombustibel òf un empresa kaminda ta
desmantelá vehíkulo di motor.
Entidat públiko Boneiru ta duna pèrmit pa empresa di tipo 3, miéntras ku Reino ta duna
pèrmit pa empresa di tipo 4.
Regla general i obligashon di notifikashon
Pa empresa di tipo 1 i 2 regla general ta na vigor, kaminda empresa di tipo 2 ta obligá pa
hasi un notifikashon promé ku nan kuminsá ku nan aktividatnan. Empresa di tipo 3 i 4 tin
mester di un pèrmit.
Supervishon i mantenshon di lei
Outoridat kompetente ta tene supervishon riba kumplimentu ku e reglanan di medio
ambiente. Kolegio Ehekutivo ta e outoridat kompetente pa empresa di tipo 1, 2 i 3,
miéntras ku minister di Infrastruktura i Maneho di Awa ta responsabel pa empresa di tipo
4. Asina esaki ta pará den legislashon.
Implementashon lokal mas detayá di normanan nobo
E Dekreto di Establesimentu i Aktividat BES (IAB) ta resultado di un kolaborashon entre
gobièrnunan lokal, gobièrnu di Reino i Servisionan di Medio Ambiente
(Omgevingsdiensten). Den e tempu binidero ta kontinuá ku e kolaborashon akí den forma
di un programa, ku kua ta mehorá dunamentu di pèrmit, i supervishon i mantenshon di lei
pa e ambiente di biba físiko.
For di 1 di aprel 2024 e Dekreto di Establesimentu i Aktividat BES (IAB) a drenta na vigor
den fase. Di e manera akí e empresanan i organisashonnan enbolbí ta haña sufisiente
espasio pa hasi e invershonnan nesesario pa loke ta trata e materialnan ku ta nesesario
pa por kumpli ku e reglanan.
