Ku hopi satisfakshon, suskrito Miembro di Parlamento pa frakshon di MFK, David Seferina a tuma nota ku Minister presidènt Gilmar Pisas a kumpli ku palabrashonnan hasi na pueblo di Kòrsou, esta, di habri fronteranan entre Kòrsou i Venezuela tantu riba e espasio aéreo i tambe e parti marítimo.
Frakshon di MFK a tuma nota ku despues di e anunsio di re-apertura di frontera ku a tuma lugá dia 3 di aprel último, no mas ku un luna despues nos por a risibí un di e barkitonan di fruta ku berdura den un forma ofisial dor di nos mandatarionan na momentu ku un di e barkitonan a drenta haf di Kòrsou, i ku ta bai keda pendiente pa mas den transkurso di dianan benidero.
Despues di kasi 4 aña porfin pueblo di Kòrsou ta risibí e barkitonan di fruta, berdura i peska i pronto tambe e barku nan di benta por mayor(Groothandel), esaki danki na e esfuersonan di gabinete Pisas ku a persistí ku e akto aki mester a tuma lugá. Despues di kasi 2 aña den Gobernashon Gabinete Pisas a kòrda riba e hòmber chikí dor di pone prioridat pa frontera habri ya asina pueblo di Kòrsou por disfrutá di fruta i berdura fresku pa un preis muchu mas abou, spesialmente ku ta pagabel pa e pueblo.
Ku e akto históriko aki, pueblo di Kòrsou por mira klaramente ku minister President Gilmar Pisas ta kumpliendo ku su promesa ankra den e akuerdo di gobernashon kaminda lo bai drecha e relashon bèk ku a ser dañá entre pais Kòrsou i repúblika di Venezuela.
P’esei na nòmber di frakshon di MFK mi ke felisitá Minister presidènt i su Gabinete pa e tremendo trabou hasi pa pueblo Kòrsou.