Miembro di Konseho Insular Edison Ellis: MPB/UPB ta atendé hopi bon ku gobernashon

Miembro di Konseho Insular (MPB) Edison Ellis ta kontentu i satisfecho pa e forma kon e gobièrnu ku su frakshon ta sostené, huntu ku UPB, ta atendé ku gobernashon di Boneiru, apesar di tur desafio i opstákulo ku nan ta konfrontando.

Edison Ellis: “Hopi hende no ta realisá ku mundu a pasa den un pandemia formal e último un aña i mei i ketu bai no por konta e lucha kontra e vírùs komo ganá. E impakto di e pandemia di Covid-19 drástikamente a kambia e moda di biba di hopi hende, inkluí e hubentut. Skolnan a sera pa un temporada, eksámen i otro eventonan posponé i servisionan di salubridat públiko a keda limitá.” Segun Ellis, por tuma nota kon e hòspitalnan di Aruba i Kòrsou aktualmente a yena i ku a kanselá operashonnan elektivo. Trabou den sierto sektornan tambe a keda limitá i sosialisá ku amigunan i famia a keda deskurashá. Hóbennan ta buska distraishon na bichnan i lugánan públiko, pa asina haña maske ta un tiki distraishon, pero esaki tambe ta keda limitá i hasta ta kastigabel pa lei. 

Impakto

“Si nos tira un bista riba e impakto di Covid-19 riba islanan chikitu na mundu, por saka afó ku e islanan aki ta hopi vurnerabel pa shòknan eksterno ekonómiko i finansiero. E sektor di servisio por ehèmpel ta laba tin ora hasta te ku 70% di nan produkto interno brutu. Ta esakinan a kai afó, komo konsekuensia ku probesa a bula bai haltu. Ku probesa ta bin problemanan sosial i kriminalidat, ku aktualmente ta asotando sierto di e islanan aki, sin ku nan tin un bista ki dia e pesadia aki ta kaba”, segun konsehal Ellis.

Ellis ta sigui splika ku pa evitá ku Boneiru ta slep bai den dekadensia, e gobièrnu di MPB-UPB tabatin i te ainda tin un bon komunikashon ku e sekretario di estado Raymond Knops i e otro ministerionan. Esaki konkretamente a resultá ku a bin ku un skema di supsidio temporal pa gastunan salarial i pèrdida di entrada i e skema pa supsidio pa kompensashon di gastunan fiho i kanselashon temporal di pago di impuesto.

Plenchi di trabou

Segun Ellis, e proyekto di Plenchi di Trabou tambe ta bale la pena menshoná. “Plenchi di Trabou ta un punto sentral unda buskadó i dunadó di trabou por akudí pa informashon i servisio riba tereno laboral. Mi ta konvensí ku e mihó manera pa sali for di pobresa ta trabou. E gobièrnu di MPB-UPB ta hasi lo máksimo pa mantené trabou pa e pueblo boneriano.”

“Te ainda tin hopi trabou pa hasi. E aparato gubernamental ta den un re-organisashon, pa un mihó servisio pa pueblo, mester traha riba e maneho finansiero, hasta nos komo miembro di konseho Insular mester sa di hasi nos trabou mas mihó i stòp di reuní di mas den komishonnan fiho, ku solamente e meta pa tranka gobernashon i trata na sinta riba stul di gobièrnu”, Ellis ta trese dilanti, agregando ku “ta trabou tin.”

Barika yen

“Aparentemente nada no ta bon aki na Boneiru. Sierto elementonan ku barika yen, danki na e medidanan finansiero ku a keda akordá, i hasta sierto hendenan den eksterior ku òndersant i nada pa hasi, konstantemente kier purba di kibra e gobièrnu di MPB-UPB.” Esaki Edison Ellis di MPB ta trese dilanti. Ellis ta konsehá e hendenan aki pa peña saka, pasobra e gobièrnu aki mester sigui hasi su trabou te na final.

Ellis: “Te ainda Boneiru a skapa di konsekuensianan di un pandemia global. No lubidá ku goberná durante un pandemia ta sumamente difísil i ta mas ku klaro ku lo bo no logra tur bo ophetivonan, pasobra simplemente tin otro prioridat. Mira kiko ta pasando na Kòrsou, Aruba i St. Maarten.