Miembro di konseho Insular Daisy Coffie di bishita na Krusada

Den su afan pa sigui informá su mes riba diferente tereno i pa krea un bista diversifiká kiko ta pasando na Boneiru Daisy Coffie tabata di bishita  na Krusada, lanthùis Guate­mala, pa pone su mes na altura di tur e trabounan ku ta tuma lugá einan. Krusada ta un organisashon den e sektor di kuido ku ta akapará diferente gremio di kliente.

Na Krusada e direktor, Sr. Junny Josephina, ku ta enkargá ku e maneho diario di Krusada a risibí nos. Na promé instante nos a haña un splika­shon ekstenso di e eksperensia di Sr. Josephina ku a hasi hopi trabou di pone organisashonnan den kuido manera Krusada riba pia, den prinsi­pal­men­te Oropa Oriental na paisnan manera  Rumania, Ukrania, Molda­via i Rusia. Despues  nos a haña un splikashon di e organisashon, e ser­vi­sio­nan ku nan ta brinda, opstákulonan ku nan a i ta enkontrá i tur e posibilidatnan ku e organisashon tin.

Krusada ta un fundashon ku su direktiva ku ta guia i supervisá tur loke ta pasa den e organisashon. Manera nos a bisa kaba e operashon diario ta kai bou di un direktor i e organisashon tin diferente departamento enkar­gá ku kuido di diferente kliente i servisio ku nan ta duna. Tin un total di 8 departamento ku ta duna diferente servisio. E departamentonan ta:

Refugio Tabitha :

Refugio Tabitha ta un akohida den un ambiente protehá pa hende muhé ku yu òf sin yu. Aki nan ta biba den un temporada di krísis temporal ku guia na midí. Refugio Tabitha ta un kaminda pa nan haña sosiegu i re­ku­pe­rá.

Speransa:

Speransa ta un lugá di biba protehá pa hendenan ku mester di un lugá pa keda temporalmente. Aki no tin guia i e kliente tin ku paga un hür chi­kí. Aki ta yega hendenan ku no ta bin na remarke pa por ehèmpel Refu­gio Tabitha. E ta puru un lugá temporal pa surpasá un krísis spesífiko.

Warda mi rin:

Warda mi rin ta un tayer sosial protehá pa hendenan ku limitashon men­tal òf físiko kaminda nan por traha bou di guia. Krusada ta ofresé un área di trabou i entrenamentu pa nan por siña diferente kompetensia i abi­li­dat­nan pa nan por tin perspektiva pa futuro. Semper teniendo kuen­ta ku nan limitashonnan.

 Pasadia:

Krusada tin tambe un pasadia protehá pa adiktonan, eks-adiktonan, pen­shona­do­nan, hendenan ku no tin un kaminda pa biba, hende den sole­­dat i hendenan ku limitashon físiko kaminda nan por ta aktivo bou di guia. E meta di e pasadia ta krea kustumber di trabou, krea struktura i regularidat i kontaktonan sosial. Ta importante e parti di autososteni­bili­dat. E plantashon di berdura orgániko tambe ta kai bou di esaki. En total tin 4  greenhouse den uso aktualmente, kaminda ta planta diferente ber­du­ra. Tin mas greenhouse ku no ta den uso pa motibu di falta di kapasi­­dat pa pone esakinan den operashon.

Komienso:

Aktivashon di resosialisashon ku JICN

Den koperashon ku JICN (Justitiële Inrichting Caribisch Nederland) Kru­sa­da tin un trayekto di aktivashon pa trabou. Akinan detenidonan den nan último fase di detenshon ta bin pa kuminsá prepará pa trabou.
Nan ta haña ‘coaching’ i guia den trabou di fishi bou di supervishon di bewaker i guia di JICN. Trabounan di e.o karpinté fini, lasdó i mekániko. Nan ta traha kos di palu di palèt i bende esakinan. Nan ta drecha baki  grandi di sushi i tambe nan ta drecha outo. Esaki ta pa yuda e re-inte­­gra­shon den komunidat. Aki nan ta prepará pa bai e akohida Adelanto i despues den komunidat.

Adelanto:

Adelanto ta un akohida protehá pa eks-detenidonan ku guia riba 4 te­reno esta biba, traha, relashon i propósito. Aki e eks-detenido ta haña guia pa resosialisá den komunidat di Boneiru. Na final e meta ta pa e kliente tin  un trabou, un kas, relashonnan sano i propósitonan di bida. Tur esaki ku e meta pa evitá ku e ta kai atrobe den gara di hustisia.

 Nunka Mas!

Nunka Mas ta un programa den koperashon ku SRCN (Stichting Reclassering Caribisch Nederland) kaminda klientenan ku kastigu di trabou/alternativo ta bin pasa nan kastigu i duna un kontribushon positi­vo na komunidat. Krusada ta hasi uso di e oportunidat pa traha na e persona i yud’é pa e no kai den gara di hustisia atrobe. Esunnan mas hó­ben ta keda asigná na un adulto ku ta duna nan guia i coaching.

Walk In:

Walk In ta un di e servisionan mas bisto den komunidat. Pa medio di ofresé algun servisio básiko por evitá molèster den bario. Na Walk In e kliente por haña desayuno i kuminda di mèrdia. Tin kama kaminda nan por sosegá nan kurpa i e kliente por baña i haña paña limpi. Tin ayudo sosial  di MHC (Mental Health Caribbean), IWO (desaroyo integral di bario) i nan por partisipá na e aktividat­nan ku tin pa nan. Esun ku ke por tuma e promé stap pa sali for di su adikshon.

Krusada ta kere fuertemente den relashonnan di kolaborashon ku otro organisashonnan. P’esei kaminda ta nesesario Krusada ta traha den koperashon ku otro organisashon den e kadena di ayudo i kuido.

Na lanthùis Guatemala Krusada tin un kushina i un tienda kaminda por kumpra e diferente produktonan ku nan ta produsí den e diferente sekshonnan di Krusada:  kuminda, bèrdura, obra di man i hopi mas.