AHATA a tene su asamblea general anual na Alhambra Ballroom cu un orador special pa beneficia miembronan. Den cada asamblea general CEO y Presidente di AHATA, Tisa LaSorte, ta informa miembronan di e curso di asuntonan y actividadnan cu e asociacion ta bezig cu ne. E aña ki AHATA tin diferente workshops planea pa miembro y campañanan di consientisacion pa crea mas conocemento den comunidad di e industria di turismo. Un meta pa 2023 ta pa inspira mas persona pa realisa un carera den Aruba su industria principal.
Regularmente, e asamblea di AHATA ta inclui un orador pa presenta riba diferente topico. E biaha aki AHATA a invita Sr. Danny Bader, un orador renombra di Merca, pa hasi su presentacion unico riba e topico di liderasgo na miembronan presente. Danny Bader su bida a keda tranforma despues cu ela experiencia morto y logra biba bek. Awor e ta dedica su tempo na educa personanan pa inverti den nan mes, aumenta focus, y desaroya vision. Su mensahe principal tabata pa un lider ilumina su mes y lidera cu 4 elemento cu ta deletreá LOVE; Lealtad, Optimismo, Vision, y Empatia.
Cu e presentacion aki, AHATA kier a apoya desaroyo personal di lidernan den diferente negoshi y pa yuda nan nabega e expectativa empresarial cu constantemente cambiando y reevalua maneho di personal efectivo. Miembrecia di AHATA ta consisti di 145 compania varia, y e asociacion ta representa 11,568 empleado den forsa laboral na Aruba. AHATA continuamente ta sostene e progreso di Aruba su industria di turismo, economia, y bienestar general.
