Djarason atardi, 9 di febrüari último, Tabatin un reunion di Komishon Fiho di e Direktorado di R&O ku ta e Direktorado di Planifikashon i Desaroyo bou di kua ta kai e asuntu di tereno di gobièrnu.
Durante di e reunion aki, Kolegio Ehekutivo a duna palabra na un eksperto ku ta bai duna un man ku e asina yamá ‘Kadernota Grondbeleid’, ku ta un dokumento ku tin hopi aña kaba ta bai bini pa atendé kuné den Konseho Insular. Den e dokumento aki ta trata kon Konseho Insular lo bai atendé ku tur loke ku tin di aber ku tereno di gobièrnu, kiermen terenonan di e pueblo di Boneiru pa ku otorgamentu. Na un dado momentu e eksperto a duna un splikashon di e manera ku e tin pensá pa bai atendé ku esaki huntu ku e miembronan di Konseho Insular den dos seshon den forma di un ‘workshop’ ku lo tuma lugá dianan 15 i 17 di febrüari próksimo.
Di parti di e presidente di e Komishon Fiho, huntu ku sostén di koalishon, e notifikashon a subi mesa ku ta bai tene e ‘workshop’nan aki ku porta será. Akinan Frakshon di Partido Demokrat a pidi un punto di òrdu mustrando e presidente ku pa e frakshon esaki no ta aseptabel. Frakshon di Partido Demokrat ta di opinion ku tur loke ta trata asuntunan di pueblo, mester keda tratá di un forma habrí kaminda pueblo, pa medio di tur e medionan di komunikashon disponibel, por skucha kon su representantenan ta defendé nan interes. Michael Pieters, komo miembro di e Komishon Fiho di R&O, a motivá su opheshon fuertemente pidiendo pa esaki keda notulá pa ‘Griffier’.
Segun Michael Pieters, no ta posibel pa trata un tópiko asina importante ku porta será di manera ku e pueblo di Boneiru no por skucha ni tampoko por vosiferá su opinion na su representantenan tokante e manera ku e ta pensa ku mester atendé ku e asuntu di tereno.
Mas aleu Michael Pieters a bisa ku seshonnan tené ku porta será den pasado tabata ku miembronan di Konseho Insular, ‘Griffie’ i presidente di Konseho Insular pa yega na un mihó funshonamentu di Konseho Insular òf tabata pa motibu di diferente reunion kaminda por ehèmpel Ministerio Públiko kier a informá Konseho Insular di algu ku tin su sekresia pa públiko. Pero no por ta asina ku un asuntu ku ta konserní pueblo di Boneiru ta keda atendé tras di porta será. Esaki no ta demokrátiko i ta bai kontra di tur prinsipio di bon gobernashon i transparensia den gobernashon.
Finalmente Michael Pieters ta indiká ku e ta di akuerdo pa e reunion aki, den forma di un ‘workshop’, tuma lugá na bienestar di pueblo di Boneiru, pero sí ku portanan habrí i kaminda transmishon por tuma lugá pa asina e habitantenan di Boneiru por skucha kiko ta e plan pa ku asuntu di nan terenonan.