Aunke rond di henter e evento tabatin cosnan positivo so tabata pasa, tambe tin cosnan no mucho bon a pasa, entre nan ta un di e entrevista cu a keda duna cu AD di Hulanda, pero cu no a formula e articulo manera e ta, Segun Rey di Zomer Carnaval Orwin Gomes a expresa.
Na momento cu mi a gana e competencia y a keda corona hopi di e periodistanan a haci un entrevista algemeen y riba zomercarnaval, pero e plataforma AD tabata kier a sa un poco mas di mi bida, Asina Rey di Zomer Carnaval Orwin Gomes ta duna di conoce.
No tabata un problema pa por a conta e storia real mirando cu tur hende sa cu Hulanda no ta un pais facil pa establece. E storia di mi bida mi a dicidi di conta esaki pa inspira hende, pero na mes momento a traha duro pa por logra e titulo maximo como Rey di Zomer Carnaval.
Mi tin mas cu 1 aña sin cas, pero esey no kiermen cu mi ta “dakloos”, E palabra dakloos tin un otro significacion, un persona cu ta dakloos ta un hende cu no tin cas, no tin trabao, ta biba bao brug. Sinembargo nada di esaki nan ta e situacion actual di Rey di Zomer carnaval debi cu e tin trabao, e ta gana su placa y e ta un entrepeneurs independiente, pero e realidad di Hulanda ta dificil pa haya un cas principalmente na Rotterdam.
Na varios ocasion a bay gemeente pa pidi yudansa bo no ta haya, pero otro persona nan manera inmigrantenan di otro pais ta haya hopi mas lihe, cual cu pa Rey di Zomer Carnaval Orwin Gomes ta haya cu ta ok tambe.
E articulo den e corant AD cu a keda traha a keda interpreta otro , pero na mes momento ta comprendibel. Ta lamenta cu a cambia e palabranan kico cu realmente a ser bisa y pinta e situacion pio di loke realmente e ta. No ta un secreto cu Hulanda ta un pais dificil pa haya cas , pero cu perserveransa y confia den bo mes un dia bo ta yega na bo mes un cas y na momento cu bo ta haci cosnan bon bo ta haya hende ta yudabo.
Sinembargo Rey di Zomer carnaval Orwin Gomes ta consciente cu na momento cu bo ta hopi conoci semper lo skirbi un punto di bo negativo, aunke cu si mester wak e articulo den su totalidad AD no kiermen asina malo tampoco, pero e la ilustra malo si cu e simpel palabra “dakloos” cu tin full un otro significacion y esaki a caya den mal tera cerca varios hende na Hulanda y na Aruba.
Hopi ta e yamadanan cu a drenta, hopi ta e yudansanan cu a keda ofreci door di personanan desconoci tambe. Sinembargo Rey di Zomer Carnaval Orwin Gomes ta agradecido na tur esunnan cu ta preocupa pe, pero di aki kier a manda e mensahe cu e ta ok, e no ta dakloos , e tin trabao , e tin cas y e ta ok na Hulanda.
Segun Rey di Zomer Carnaval si berdaderamente mi tabata dakloos lo mi ta na Aruba dia bieu caba. Na hulanda e sistema mes ta stancabo, tin yen di rekisitonan no relevante pa por yega na un cas, porehempel si bo ta mucho bieu nan no ta gusta y ta prefera di huur cu muchanan hoben cu ta studiante, esaki ta hunga un rol. Tin ocasion ta yega na remarca pero ta pidi un deposito di 3 of 4 luna cu ta 4 mil euro dies pa e deposito so, pero tambe debi cu mi ta un entrepeneur hopi ta cera porta debi cu no ta confia entrepeneurs debi cu tin biaha ta bay bon y otro biahanan no ta bay suficiente bon. E situacion ta comprendibel, pero na mes momento Hulanda engeneral mester ta consciente cu nan ta limita un persona pa logra stabilisa na Hulanda.
Ta pone tanto limite pero na mes momento tin e placa pa paga pa e apartamento, un situacion cu ta di Hulanda y mester biba cu ne te na momento cu berdaderamente haya un solucion. Aunke cu tin situacionnan cu un ta daña pa otro, tambe tin e situacion cu e municipio no ta yudabo cu e parti aki, pero si ta yudabo na momento cu bo no tin trabao. Den e caso aki mi tin trabao pero no tin cas, pero na e municipio ta yuda esun cu no tin trabao, nan ta yuda cu un uitketing y un cas despues. Esaki ta e sistema cu tin na Hulanda cu ta haci y pone e situacionnan dificil pa por haya un cas na Hulanda.
Segun Rey di Zomer Carnaval na momento cu e articulo di AD a sali hopi hende a mira e situacion malo, pero pa Orwin esaki no tabata malo solamente, pero e ta wak e den e manera mas positivo unda cu awo e sa cuanto hende realmente ta stime y ta preocupa pe y cu a brinda nan ayudo. Sinembargo pa Rey di Zomer Carnaval ta duna di conoce cu bida ta sigui y e no lo keda para of stroba pa un situacion asina aki, pero si ta lamenta, pero na mes momento kier manda un mensahe cu e ta bon y cu no mester worry kico hende ta pensa di bo, abo ta traha pa bo placa y abo sa kico bo ta haci cu ne.
Na momento cu bo ta un cara conoci den comunidad semper ta haya hende cu kier kibrabo, pero pesey mes bo mester ta fuerte suficiente y sigui bay padilanti pa logra tur e metanan cu bo kier logra den bida. Mi ta ok y mi no ta dakloos.