Fraccion di PAR, MAN i TPK a tuma nota di e carta cu Minister Presidente Pisas a manda pa Presidente di Parlamento reaccionando riba e peticion pa un reunion publico urgente riba e situacion di ENNIA. Como representante maximo di pueblo nos tambe tin nos pregunta i preocupacion rondo di e situacion di ENNIA i su posibel consecuencianan.
Ta inaceptabel i no democratico con un Minister Presidente ta scoge pa acorda “media stilte” riba e organo representativo democratico di nos pais. Mientras cu Gobierno Hulandes den nomber di secretario di Estado sra A. van Huffelen a duna informacion riba ENNIA den diferente forma na Tweede Kamer. Despues di discurso di Rei Willem Alexander riba Prinsjesdag sra. Van Huffelen a tene un rueda di prensa i papia di e problematica di ENNIA.
Den e rueda di prensa sra. Van Huffelen a duna informacion tocante e problema di likides cu e compania ENNIA ta enfrenta.
Den mes rosea Tweede Kamer a debati riba e peticion di fiansa di 1.2 miar florin Antiano cu Gobierno di Corsou a pidi. Tur documento di peticion i consehonan di CFT riba e peticion ta publico den cual por mira e consecuencia cu e fiansa aki tin pa presupuesto 2024 i di mas aña di nos pais Corsou.
Fraccion nan di PAR, MAN i TPK kier mustra Presidente di Parlamento cu den su funcion e no por acepta di un Gobierno cu ta indica cu no ta bin duna cuenta i rason na Parlamento riba un problematica grandi manera esun di ENNIA. Sigur ora tin tur indicacion cu e repercusion cu e problematica di ENNIA tin pa nos comunidad i cu na final Parlamento tambe mester tuma decision riba esaki.